Мексикада бир қанча эгасиз итлар жазирамадан қутулишнинг янги йўлини топди – улар электр анжомлари сотиладиган дўконга кириб, одамлардан ҳадиксирамаган ҳолда салқин савдо майдончаси ўртасида ётиб олди, деб хабар бермоқда AdMe нашри.
Салқинланишнинг бундай усули ажабланарли эмас — кўпчилигимиз иссиқ иш кунининг қоқ ярмида сиэста (иссиқ мамлакатларда куннинг иккинчи ярмида одат тусига кирган уйқу вақти) ўтказишга қарши эмасмиз. Яна бир нарса ажабланарли: дўкон ходимлари тўрт оёқлиларни ҳайдаб солмаган, дўкон тармоқлари эгаси эса бошпанасиз ҳайвонлар ёрдамга муҳтожлигини қайд этган.
Мексиканинг “Электра” савдо тармоғи эса кутилмаганда ижобий PR бўлди. Дуранго штатидаги тармоқ дўконларидан бирида ташриф буюрувчилар кўргазмадаги кондиционерлар остида, блендер ва кофе машиналари ўрнатилган расталар орасида ётган итларни суратга олди. Ва бу суратлар тезда ижтимоий тармоқлар бўйлаб тарқалди.
Эҳтимол, савдо майдончасининг ўртасида жойлашиб олган катта итлар дўконга ташриф буюрувчиларга зарар бериши мумкин. Аммо жонзотларга нисбатан бундай инсонпарварлик муносабати тармоқ фойдаланувчиларини ҳайратга солди ва олқишига сазовор бўлди.
Тармоқ эгаси — таниқли мексикалик миллиардер Рикардо Салинас Плиэго вақтинчалик қўним топган итларни безовта қилмасликка ва уларни залдан ҳайдаб чиқармасликка чақирди. Унинг таъкидлашича, эгасиз ҳайвонларни қўллаб-қувватлаш унинг компанияси сиёсатидаги нуқталардан бири: “Бу менинг барча компанияларимда ит ва мушукларга яхши муносабатда бўлиш бўйича буйруғим. Сўздан кўра ҳаракат муҳимроқ”, — деб ёзган компания раҳбари.
Мексика бу ёзда жазирама тўлқинини бошдан кечирмоқда, баъзи жойларда ҳарорат 40 °C дан ошади. Шу боис, бундай инсонпарварлик ишораси кўпчилик тармоқ фойдаланувчилари томонидан маъқулланди.
“Бизнинг замонамизда олқишга арзийдиган эзгу иш”, “Мен яна инсониятга ишондим”; “Бундай акциядан сўнг мен ушбу дўкондан мотоцикл сотиб олишга тайёрман”, деб ёзади фойдаланувчилар.
Озгина меҳрибонлик ва инсоний муносабат ҳақиқатан ҳам дунёни ўзгартириши мумкин.
Изоҳ (0)