Янги Зеландия адлия вазири йўл транспорт ҳодисасини содир этганидан кейин истеъфога чиқди. У ҳибсга олинишда қаршилик кўрсатган, деб ёзади The Guardian.
Янги Зеландия бош вазири Крис Хипкинснинг сўзларига кўра, Кири Аллан хоним Веллингтонда аварияга учраган, у қўлга олинган ва тўрт соатдан кейин полиция маҳкамасидан қўйиб юборилган.
Полиция уни машинани эҳтиётсизлик билан бошқариш, шунингдек, полициячига қаршилик кўрсатганликда айблади. Тиббий кўрик давомида вазир маст ҳолатда экани аниқланди.
Бир вақтлар Лейбористлар партиясида портлаётган юлдуздек кўрилган Аллан яқинда жуфти билан ажрашгани ва ҳамкасблари билан ёмон муносабатда бўлаётгани ортидан руҳий саломатлик учун таътилга чиққанди.
Ҳозирча Кири Аллан парламент аъзоси бўлиб қолмоқда. У қилмишидан афсусда эканини ва сиёсатда қолиш-қолмаслик ҳақида ўйлаш учун уйига қайтишини айтди.
“Охирги ҳафталарда бир қатор шахсий қийинчиликларга дуч келдим. Бу муаммоларни ҳал қилиш учун таътил олдим, улар ва вазир сифатидаги ишимни мувозанатда сақлай оламан деб ўйлагандим. Кечаги хатти-ҳаракатларим менда ҳаммаси жойида эмаслигини кўрсатди, ўзим ва ҳамкасбларимни ташвишга қўйдим”, — деди у.
Кири Аллан ҳодисаси миллий сайловларга уч ойдан камроқ вақт қолганда Янги Зеландия ҳукумати вазирлари билан боғлиқ қатор қўпол хатолар ва жанжаллардан бири ҳисобланади. Бунга қадар бир қатор вазирлар истеъфога чиққан ёки ишдан бўшатилган. Бош вазир Крис Хипкинс январь ойида Жасинда Ардерн истеъфога чиққанидан сўнг ушбу лавозимни эгаллаган эди.
Янги Зеландияда миллий сайловлар 14-октябрь куни бўлиб ўтади.
Изоҳ (0)