Odessa meri Gennadiy Truxanov videomurojaat yo‘llab, unda 23-iyulga o‘tar kechasi Rossiya Mudofaa vazirligining shaharga uyushtirgan yangi hujumi haqida gapirdi. Videoda mer Rossiya fuqarolariga qarata rus tilida gapirdi.
“Rossiyaliklar uchun rus tilida ikki og‘iz gapim bor. Odessa sizdan qanchalik nafratlanishini bilsangiz edi. Nafaqat nafratlanadi, balki jirkanadi. Siz kichkina bolalar bilan, pravoslav cherkovlari bilan urushyapsiz. Nima desam ekan — raketalaringiz hatto qabristonlarga uchmoqda. Shu urushni deb sizlarni turlicha atashmoqda: rashistlar, orklar, marazlar, razillar. Lekin bular hali holva. Siz oila va yaqinlar, axloq va qadriyatlardan mosuvo maxluqsiz, xolos. Kelajagingiz ham yo‘q. Siz odessaliklarni yaxshi bilmaysiz. Bizni sindirolmaysiz, aksincha, yanada g‘azablantiryapsiz. Oddiy odamlarning dardi va g‘azabi bilan oshgan himoyachilarimizning kuchi siz uchun o‘limga hukm bo‘ladi. Ukrainaga shon-sharaf!”, — dedi Truxanov.
18-iyuldan beri Rossiya Ukraina janubidagi, jumladan, Odessadagi port infratuzilmasi obyektlariga hujum qilmoqda va buni Qrim ko‘prigidagi portlash uchun “qasos” deb atamoqda. 23-iyulga o‘tar kechasi Odessa urush boshidan beri shaharning tarixiy markaziga qilingan eng yirik hujumga uchradi. Shaharga 19 ta raketa uchirildi, ulardan to‘qqiztasi urib tushirildi.
Odessa markazida bir nechta turarjoy binolari shikastlangan, kamida 25 ta meʼmoriy yodgorlikka zarar yetgan, shahardagi eng yirik pravoslav cherkovi bo‘lgan Preobrajenskiy kafedral sobori vayron qilingan. Bir kishi halok bo‘lgani va 19 kishi yaralangani xabar qilingan.
Rossiya Mudofaa vazirligi sobor Rossiya hujumi nishoniga aylanganini inkor etib, bino “Ukraina havo hujumidan mudofaa operatorlarining savodsizlarcha harakatlari” tufayli vayron bo‘lganini da’vo qilmoqda.
Izoh (0)