Toshkent shahar Shayxontohur tumanida elektrobus haydovchisi keskin tormoz bergani oqibatida yo‘lovchilardan biri yiqilib, shifoxonaga olib ketildi. Bu haqda “Toshshahartransxizmat” AJ axborot xizmati xabar berdi.
Unga ko‘ra, holat 24-iyul kuni soat 17:20 da, “1-Avtobus saroyi” filiali haydovchisi Yutong rusumli elektrobusni 28-yo‘nalishda Shayxontohur tumani, A.Navoiy ko‘chasida maxsus A yo‘lak bo‘ylab boshqarib borayotgan vaqtda sodir bo‘lgan. Elektrobusning chap tarafida harakatlanib ketayotgan Nexia-3 yo‘l harakati qoidasini qo‘pol ravishda buzib, yo‘lning 2-qatnov qismidan harakatini keskin o‘ngga burib, xavfli holatni keltirib chiqargan.
Nexia-3‘ning ushbu keskin xatti-harakati (monyovri) natijasida bo‘ladigan yo‘l-transport hodisasini oldini olish maqsadida, elektrobus haydovchisi A.D keskin tormoz olishga majbur bo‘lgan. Natijada elektrobus salonida tik turgan holda ketayotgan yo‘lovchilardan biri (shaxsi hozircha ma‘lum emas) yiqilgan. Yo‘lovchiga tez tibbiy yordam ko‘rsatish maqsadida, tez yordam chaqirilgan va elektrobus chiptachisi hamroxligida yo‘lovchi shiifoxonaga olib ketilgan.
Hozirda mazkur yo‘l-transport hodisasi Toshkent shahar Ichki ishlar bosh boshqarmasi Yo‘l harakati xavfsizligi boshqarmasi tomonidan belgilangan tartibda rasmiylashtirilgan bo‘lib, xizmat surishtiruvi o‘tkazilmoqda.
Izoh (0)