Surxondaryo viloyatining Qumqo‘rg‘on tumanida yashovchi bloger Rustambek Tog‘ayev xonadonini Ichki ishlar xodimlari bosdi. Bu haqda “Daryo”ga maʼlum qilgan blogerning aytishicha, adliya vaziri o‘rinbosari Sherzod Rabiyev uning ustidan shikoyat qilgan bo‘lishi mumkin.
22-iyul, shanba kuni xonadonimga uch nafar IIB xodimi keldi. Va mening ustimdan shikoyat tushganini, shu sabab mening telefonimni titkilab, olib ketmoqchiligini aytdi. O‘zlarini Qashqadaryo viloyati Dehqonobod tumani IIB xodimlari deb tanishtirganlardan biri Asilbek Rustamov ekanini, tumanda tergovchi bo‘lib ishlashini bildirdi, — deydi “Daryo” bilan suhbatda bo‘lgan bloger.
Facebook foydalanuvchisi Rustambek Tog‘ayevning aytishicha, tergovchi ekanini aytgan Asilbek Rustamov undan telefonini so‘ragan va ko‘rib bo‘lgach, telefonini olib ketmoqchiligini aytgan.
Telefoningizni berib turing, ko‘ray, dedi. Xo‘p deb bersam, ichini titkilab, nimalarnidir yozdi va telefonimni olib ketmoqchiligini aytdi. Bu telefon mening shaxsiy mulkim ekanini aytib, telefonimni olib ketishi uchun sud qarori kerakligini aytdim. Va Surxondaryo viloyati prokuraturasiga qo‘ng‘iroq qilib, holatdan xabardor qildim. Viloyat prokuraturasi axborot xizmati bilan telefon orqali gaplashib, Dehqonobod tumani IIB xodimlari shaxsiy telefonimni olib ketmoqchi bo‘lishayotganini aytdim. Alisher (viloyat prokuraturasi axborot xizmati rahbari. Tahririyat izohi) IIB xodimlari bilan gaplashib, bunga haqqi yo‘qligini, buning uchun sud qarori kerakligini eslatdi. Xodim esa o‘zi qaror chiqarib kelganini, telefon rusumini shu yerda yozib, telefonimni olib ketmoqchiligini aytdi. Mumkin emas, deyildi. Shundan so‘ng Qumqo‘rg‘on tuman IIB boshlig‘iga chiqib, holat haqida xabar berdim. IIB boshlig‘i ikki nafar xodimini yubordi. Xodimlar ham dehqonobodlik hamkasblariga telefonimni olib berolmasligini, bu mening shaxsiy mulkim ekanini aytib, biz faqat jamoat tartibini saqlash uchun keldik dedi, — deydi holat haqida gapirgan bloger.
Blogerning taxmin qilishicha, uning ustidan adliya vaziri o‘rinbosari Sherzod Rabiyev Qashqadaryo viloyat IIBga shikoyat kiritgan bo‘lishi mumkin.
IIB xodimlariga ustimdan kim shikoyat qildi, aybim nima, desam aytishmadi. Tergovchilar hujjatlar bilan tanishib chiqishimga imkoniyat berishmadi, ilova qilingan suratni olishga ulgurdim, xolos — deydi bloger.
“Daryo” jurnalisti vazir o‘rinbosarining bloger ustidan Qashqadaryo viloyat IIBga shikoyat kiritgani haqidagi maʼlumotni tekshirish uchun Qashqadaryo IIB axborot xizmati rahbari Iroda Rasulova, Adliya vazirligi axborot xizmati rahbari Sevara O‘rinboyevalarga murojaat qilib, holatga aniqlik kiritishga urindi.
Qashqadaryo IIB axborot xizmati rahbari Iroda Rasulova vaziyatdan batafsil xabari yo‘qligini, ammo tez orada aniqlashtirib, tahririyatga axborot berishini bildirdi. Adliya vazirligi axborot xizmati rahbari Sevara O‘rinboyeva esa vazir o‘rinbosarining bloger ustidan shikoyat qilishi fuqaro sifatidagi shaxsiy ishi ekanini aytish bilan cheklandi.
Vazirlik saytida vazir o‘rinbosari Sherzod Rabiyev bilan bog‘lanish mumkinligi ko‘rsatilgan +998712070461 raqamiga bir necha bor qo‘ng‘iroq qilib, zo‘rg‘a tushdik va vazir o‘rinbosari bilan suhbatlashish niyatimiz borligini bildirdik. O‘zini vazir o‘rinbosari yordamchisi Mirjalol Nafasov deb tanishtirgan masʼul Rabiyev ayni paytda xizmat safaridaligini aytdi. Jurnalist savolini tinglagan Mirjalol Nafasov tez orada savollarga aniqlik kiritishga yordam berishini maʼlum qildi. Biroq kutilgan vaqtda javob bermadi.
Mazkur voqea haqida jamoatchilikni xabardor qilgan Facebook’dagi “Xalq nazorati” guruhida voqea yuzasidan qator savollar yo‘llangan.
Qonun nuqtayi nazaridan olganda, Qashqadaryo viloyati Dehqonobod tumani IIB tergovchisi Asilbek Rustamov va yana ikki xodim o‘z qarori asosida Surxondaryoda yashovchi fuqaroning uyiga borib, tintuv o‘tkazishi yoki mulkini, yaʼni qo‘l telefonini ashyoviy dalil sifatida olib ketishga haqlimi? Tintuv o‘tkazish, shaxsiy mulkni olib qo‘yish sud qarori asosida amalga oshirilmaydimi?
Dehqonobod tuman IIB tergovchisi viloyat hududidan chetga chiqib, Surxondaryo viloyatida harakat olib borishi qaysi qonun-qoidalar bilan tartibga solingan va ularning harakati qonuniymi? Gumonlanuvchiga ustidan tushgan shikoyat yoki telefonini olib qo‘yish haqidagi qaror nusxasini bermasdan harakatini davom ettirishi mumkinmi? Bunday ishlar IIB vakolatidagi ishmi?
“Daryo” vazir o‘rinbosari Sherzod Rabiyevga ham minbar berishga tayyorligini maʼlum qilib, voqealar rivojini kuzatishda davom etadi.
Izoh (0)