Сурхондарё вилоятининг Қумқўрғон туманида яшовчи блогер Рустамбек Тоғаев хонадонини Ички ишлар ходимлари босди. Бу ҳақда “Дарё”га маълум қилган блогернинг айтишича, адлия вазири ўринбосари Шерзод Рабиев унинг устидан шикоят қилган бўлиши мумкин.
22 июль, шанба куни хонадонимга уч нафар ИИБ ходими келди. Ва менинг устимдан шикоят тушганини, шу сабаб менинг телефонимни титкилаб, олиб кетмоқчилигини айтди. Ўзларини Қашқадарё вилояти Деҳқонобод тумани ИИБ ходимлари деб таништирганлардан бири Асилбек Рустамов эканини, туманда терговчи бўлиб ишлашини билдирди, — дейди “Дарё” билан суҳбатда бўлган блогер.
Facebook фойдаланувчиси Рустамбек Тоғаевнинг айтишича, терговчи эканини айтган Асилбек Рустамов ундан телефонини сўраган ва кўриб бўлгач, телефонини олиб кетмоқчилигини айтган.
Телефонингизни бериб туринг, кўрай, деди. Хўп деб берсам, ичини титкилаб, нималарнидир ёзди ва телефонимни олиб кетмоқчилигини айтди. Бу телефон менинг шахсий мулким эканини айтиб, телефонимни олиб кетиши учун суд қарори кераклигини айтдим. Ва Сурхондарё вилояти прокуратурасига қўнғироқ қилиб, ҳолатдан хабардор қилдим. Вилоят прокуратураси ахборот хизмати билан телефон орқали гаплашиб, Деҳқонобод тумани ИИБ ходимлари шахсий телефонимни олиб кетмоқчи бўлишаётганини айтдим. Алишер (вилоят прокуратураси ахборот хизмати раҳбари. Таҳририят изоҳи) ИИБ ходимлари билан гаплашиб, бунга ҳаққи йўқлигини, бунинг учун суд қарори кераклигини эслатди. Ходим эса ўзи қарор чиқариб келганини, телефон русумини шу ерда ёзиб, телефонимни олиб кетмоқчилигини айтди. Мумкин эмас, дейилди. Шундан сўнг Қумқўрғон туман ИИБ бошлиғига чиқиб, ҳолат ҳақида хабар бердим. ИИБ бошлиғи икки нафар ходимини юборди. Ходимлар ҳам деҳқонободлик ҳамкасбларига телефонимни олиб беролмаслигини, бу менинг шахсий мулким эканини айтиб, биз фақат жамоат тартибини сақлаш учун келдик деди, — дейди ҳолат ҳақида гапирган блогер.
Блогернинг тахмин қилишича, унинг устидан адлия вазири ўринбосари Шерзод Рабиев Қашқадарё вилоят ИИБга шикоят киритган бўлиши мумкин.
ИИБ ходимларига устимдан ким шикоят қилди, айбим нима, десам айтишмади. Терговчилар ҳужжатлар билан танишиб чиқишимга имконият беришмади, илова қилинган суратни олишга улгурдим, холос — дейди блогер.
“Дарё” журналисти вазир ўринбосарининг блогер устидан Қашқадарё вилоят ИИБга шикоят киритгани ҳақидаги маълумотни текшириш учун Қашқадарё ИИБ ахборот хизмати раҳбари Ирода Расулова, Адлия вазирлиги ахборот хизмати раҳбари Севара Ўринбоеваларга мурожаат қилиб, ҳолатга аниқлик киритишга уринди.
Қашқадарё ИИБ ахборот хизмати раҳбари Ирода Расулова вазиятдан батафсил хабари йўқлигини, аммо тез орада аниқлаштириб, таҳририятга ахборот беришини билдирди. Адлия вазирлиги ахборот хизмати раҳбари Севара Ўринбоева эса вазир ўринбосарининг блогер устидан шикоят қилиши фуқаро сифатидаги шахсий иши эканини айтиш билан чекланди.
Вазирлик сайтида вазир ўринбосари Шерзод Рабиев билан боғланиш мумкинлиги кўрсатилган +998712070461 рақамига бир неча бор қўнғироқ қилиб, зўрға тушдик ва вазир ўринбосари билан суҳбатлашиш ниятимиз борлигини билдирдик. Ўзини вазир ўринбосари ёрдамчиси Миржалол Нафасов деб таништирган масъул Рабиев айни пайтда хизмат сафаридалигини айтди. Журналист саволини тинглаган Миржалол Нафасов тез орада саволларга аниқлик киритишга ёрдам беришини маълум қилди. Бироқ кутилган вақтда жавоб бермади.
Мазкур воқеа ҳақида жамоатчиликни хабардор қилган Facebook’даги “Халқ назорати” гуруҳида воқеа юзасидан қатор саволлар йўлланган.
Қонун нуқтаи назаридан олганда, Қашқадарё вилояти Деҳқонобод тумани ИИБ терговчиси Асилбек Рустамов ва яна икки ходим ўз қарори асосида Сурхондарёда яшовчи фуқаронинг уйига бориб, тинтув ўтказиши ёки мулкини, яъни қўл телефонини ашёвий далил сифатида олиб кетишга ҳақлими? Тинтув ўтказиш, шахсий мулкни олиб қўйиш суд қарори асосида амалга оширилмайдими?
Деҳқонобод туман ИИБ терговчиси вилоят ҳудудидан четга чиқиб, Сурхондарё вилоятида ҳаракат олиб бориши қайси қонун-қоидалар билан тартибга солинган ва уларнинг ҳаракати қонунийми? Гумонланувчига устидан тушган шикоят ёки телефонини олиб қўйиш ҳақидаги қарор нусхасини бермасдан ҳаракатини давом эттириши мумкинми? Бундай ишлар ИИБ ваколатидаги ишми?
“Дарё” вазир ўринбосари Шерзод Рабиевга ҳам минбар беришга тайёрлигини маълум қилиб, воқеалар ривожини кузатишда давом этади.
Изоҳ (0)