2022-yilda Toshkent shahridagi ko‘chalarni tartibga keltirish (ta’mirlash) rejasiga muvofiq, 14-fevral kuni Alisher Navoiy ko‘chasida ta’mirlash ishlari boshlangandi. Rekonstruksiya qilish ishlari mahalliy OAV va shahar ahlining tanqidiy fikrlariga sabab bo‘lgan. Poytaxt hokimligining ma’lum qilishicha, shu sababli rossiyalik taniqli urbanist va transport mutaxassisi Arkadiy Gershman loyiha ustida ishlash uchun taklif qilingan.
2022-yilning 15-mart kuni Toshkent shahar hokimligida Navoiy shoh ko‘chasini rekonstruksiya qilish bo‘yicha yangilangan loyihaning muhokamasiga bag‘ishlangan matbuot anjumani bo‘lib o‘tgan. Anjumanda Arkadiy Gershman ishtirokchilarga amalga oshirilgan ishlar haqida ma’lumot bergan hamda ustuvorliklari ko‘plab shaharlarda qabul qilingan sxema asosida belgilangan taqdimot bilan chiqqan. Ta’kidlanishicha, ushbu sxema avvalo ko‘cha harakatining eng zaif ishtirokchilari — piyodalar, ikkinchi o‘rinda — jamoat transporti va uchinchi o‘rindagina — avtomobillarning manfaatini ko‘zda tutadi.
Arkadiy Gershman “taktik urbanizm” vositalari haqida so‘zlab, xavfsizlik orolchalarini barpo etishda qo‘llaniladigan, vaqtincha o‘rnatiladigan plastik ustunchalarni, piyodalar o‘tish yo‘llarida kunning qorong‘i paytida zarur bo‘lgan va haydovchiga yaxshiroq ko‘rinadigan kontrast yoritishni misol qilib keltirgan. Shahar sharoitida yerusti piyodalar o‘tish yo‘llarining yerosti o‘tish yo‘llari va piyodalar o‘tish ko‘priklariga nisbatan afzalliklari haqida ma’lumot bergan.
Tartibga solinmagan piyodalar o‘tish joyi — ular faqat bitta chiziqli harakatda qo‘llanishi mumkin, ikki va undan ortiq chiziqli yo‘llarda svetoforlar bo‘lishi shart. Loyihaga muvofiq, piyodalar va transport qatnovi tushunarsiz bo‘lgan katta maydonlar tushunarli chiziqlargacha qisqartirilib, bunga misol tariqasida Sirk va Chorsu maydoni yaqinidagi chorraha keltirilgan: u yerda “xavfsizlik orolchalari” va svetoforlar fazalari yordamida qatnov belgilangan yo‘nalishlarga bo‘linadi, o‘z o‘rnida bu harakatlanishni tushunarliroq va samaraliroq qiladi hamda piyodalar va haydovchilar harakatlanishi xavfsizligini ta’minlashga imkon beradi. Avtomobillar qatnovi harakatlanishning eng muammoli qismlaridan biri — chapga burilish uchun alohida chiziq ajratilishi bilan ham tartibga solinadi.
Arkadiy Gershman, Transport vazirligi huzuridagi Toshkent loyiha ofisining rahbari Murod Obidov va Toshkent shahar transport boshqarmasining boshlig‘i Anvar Jo‘rayev jurnalistlarning savollariga javob bergan:
- Piyodalar uchun xavfsizlik orolchalari harakatlanayotgan tezkor xizmat avtomobillari uchun to‘sqinlik qilmaydi, axir yong‘in o‘chirish va tez tibbiy yordam mashinalari jamoat transporti uchun ajratilgan chiziqlardan harakatlanishi mumkin;
- Farg‘ona yo‘li ko‘chasidagi piyodalar o‘tishi uchun tor qismlar, piyodalar uchun qulaylik yaratish nuqtayi nazaridan, qaytadan ko‘rib chiqiladi;
- Oqtepa maydonidagi noqulay transport tuguni o‘zgartiriladi. Hozirgi kunda tegishli tuzilmalar tomonidan maydonni rekonstruksiya qilish bo‘yicha to‘rtta variant ko‘rib chiqilmoqda;
- Avtomobillarning avtobuslar uchun ajratilgan chiziqqa chiqishi jarimaga tortiladi, bu maqsadda foto- va videofiksatsiya uchun texnik vositalar tayyorlanmoqda;
- Navoiy shoh ko‘chasidagi murakkab burilib qaytish joylari sababli, sirk yaqinida hamda piyodalar o‘tish joylarida mashinalarning burilib qaytishi uchun imkon yaratilishi rejalashtirilgan.
Izoh (0)