Одесса мэри Геннадий Труханов видеомурожаат йўллаб, унда 23 июлга ўтар кечаси Россия Мудофаа вазирлигининг шаҳарга уюштирган янги ҳужуми ҳақида гапирди. Видеода мер Россия фуқароларига қарата рус тилида гапирди.
“Россияликлар учун рус тилида икки оғиз гапим бор. Одесса сиздан қанчалик нафратланишини билсангиз эди. Нафақат нафратланади, балки жирканади. Сиз кичкина болалар билан, православ черковлари билан урушяпсиз. Нима десам экан — ракеталарингиз ҳатто қабристонларга учмоқда. Шу урушни деб сизларни турлича аташмоқда: рашистлар, орклар, маразлар, разиллар. Лекин булар ҳали ҳолва. Сиз оила ва яқинлар, ахлоқ ва қадриятлардан мосуво махлуқсиз, холос. Келажагингиз ҳам йўқ. Сиз одессаликларни яхши билмайсиз. Бизни синдиролмайсиз, аксинча, янада ғазаблантиряпсиз. Оддий одамларнинг дарди ва ғазаби билан ошган ҳимоячиларимизнинг кучи сиз учун ўлимга ҳукм бўлади. Украинага шон-шараф!”, — деди Труханов.
18 июлдан бери Россия Украина жанубидаги, жумладан, Одессадаги порт инфратузилмаси объектларига ҳужум қилмоқда ва буни Қрим кўпригидаги портлаш учун “қасос” деб атамоқда. 23 июлга ўтар кечаси Одесса уруш бошидан бери шаҳарнинг тарихий марказига қилинган энг йирик ҳужумга учради. Шаҳарга 19 та ракета учирилди, улардан тўққизтаси уриб туширилди.
Одесса марказида бир нечта тураржой бинолари шикастланган, камида 25 та меъморий ёдгорликка зарар етган, шаҳардаги энг йирик православ черкови бўлган Преображенский кафедрал собори вайрон қилинган. Бир киши ҳалок бўлгани ва 19 киши яралангани хабар қилинган.
Россия Мудофаа вазирлиги собор Россия ҳужуми нишонига айланганини инкор этиб, бино “Украина ҳаво ҳужумидан мудофаа операторларининг саводсизларча ҳаракатлари” туфайли вайрон бўлганини даъво қилмоқда.
Изоҳ (0)