Hukumat qarori bilan Pillani qayta ishlash va pilla qurti urug‘ini ishlab chiqaruvchi korxonalar tomonidan pilla boquvchilarga yetkazib berilgan ipak qurti urug‘i uchun subsidiya ajratish tartibi to‘g‘risida nizom tasdiqlandi. Bu haqda Telegram’dagi “Huquqiy axborot” kanali xabar berdi.
Nizomga ko‘ra, 2026-yil 1-yanvargacha har yili pillani qayta ishlash va pilla qurti urug‘ini ishlab chiqaruvchi korxonalarga ular tomonidan pilla boquvchilarga yetkazib berilgan har bir quti ipak qurti urug‘i uchun 120 ming so‘m miqdorida subsidiya ajratiladi.
Shunga ko‘ra:
- birinchi va ikkinchi mavsum uchun subsidiya oluvchilarning manzilli ro‘yxati shakllantiriladi (20-maygacha);
- uchinchi va to‘rtinchi mavsum uchun Manzilli ro‘yxat imzolanib, tasdiqlangan holda Ipakchilik va jun sanoatini rivojlantirish qo‘mitasiga taqdim etiladi (20-avgustgacha);
- Qo‘mita subsidiyalar berish uchun ajratiladigan mablag‘larni subsidiya oluvchining bank hisobvarag‘iga o‘tkazib beradi (10 ish kunida).
Fevral oxirlarida “Ipakchilik tarmog‘ini yanada rivojlantirish bo‘yicha chora-tadbirlar to‘g‘risida”gi prezident qarori qabul qilingan edi. Hujjat bilan Andijon qishloq xo‘jaligi va agrotexnologiyalar institutida Ipakchilik va tutchilik fakulteti ochilishi belgilangan.
Iyun boshlarida esa prezident farmoni bilan yangi tutzorlar barpo qilish uchun 105 ming gektar yer maydonlari ularning konturlarini aniq belgilagan holda Ipakchilik va jun sanoatini rivojlantirish qo‘mitasiga doimiy foydalanish huquqi asosida ajratilishi ma’lum bo‘lgandi.
Yangi tutzorlar barpo qilish uchun yer uchastkalari 10 gektardan kam bo‘lmagan o‘lchamda pillachilik klasterlari, pillachilik va tutchilik yo‘nalishidagi fermer xo‘jaliklariga, istisno tariqasida, ijara huquqi asosida ajratiladi.
Izoh (0)