Buyuk Britaniyada Ukraina prezidenti Vladimir Zelenskiy nomidagi ko‘cha ochildi, deb xabar bermoqda BBC.
“Esseks grafligidagi ko‘cha Buyuk Britaniyaning Ukraina prezidenti Vladimir Zelenskiy nomidagi birinchi yo‘li sifatida rasman ochildi. Xarloudagi Beshinchi avenyu nomi ‘Beshinchi avenyu — Zelenskiy avenyusi’ deb qayta yozildi”, — deyilgan nashr xabarida.
Qayd etilishicha, ochilishda Ukrainaning Buyuk Britaniyadagi elchisi Vadim Pristayko ishtirok etishi kerak edi, biroq tadbirdan bir necha daqiqa oldin Zelenskiy elchini ishdan bo‘shatganini ma’lum qilgan.
Esseksdagi ko‘chaga yangi nom belgisini Xarlou deputati Robert Xelfon namoyish etdi. Uning ta’kidlashicha, shahar Ukraina rahbariga sharaf ko‘rsatish uchun munosib joy, chunki Xarlou Ikkinchi jahon urushidan keyin ko‘chirilgan londonlik oilalarga atab qurilgan.
Xelfonning so‘zlariga ko‘ra, yangi Xarlou shahri “noldan” ko‘tarilgan, shuning uchun hozirgi voqea ukrainaliklar Rossiyani mag‘lub etganida “ularda go‘zal yangi shaharlar paydo bo‘lishiga umid borligini” ko‘rsatishi kerak.
Deputat, shuningdek, Rossiya bosqinidan keyin 70 ga yaqin ukrainalik qochqinlarni uy-joy va boshqa turdagi yordam bilan qo‘llab-quvvatlagan mahalliy aholini maqtadi.
Buyuk Britaniya Ukrainaga muntazam yordam bermoqda
Buyuk Britaniya Rossiya bosqinining dastlabki kunlaridan beri Ukrainaga katta yordam ko‘rsatib kelmoqda. 2022-yil 24-avgust kuni Ukraina prezidenti Vladimir Zelenskiy Buyuk Britaniyaning o‘sha paytdagi bosh vaziri Boris Jonsonni “Ozodlik” ordeni bilan taqdirlagandi – bu Ukrainada xorijliklarga berilishi mumkin bo‘lgan eng oliy mukofotdir.
Urush davomida Jonson Kiyevga uch marotaba keldi va Ukrainani qo‘llab-quvvatlashini qayta tasdiqlab, Britaniyadan yordam paketini e’lon qildi.
Britaniyaning yangi bosh vaziri Rishi Sunak Ukraina uchun xavfsizlik kafolatlarini ishlab chiqish tarafdori ekanini aytadi. Unga ko‘ra, Ukraina NATOga kirishdan oldin G‘arbdan uzoq muddatli xavfsizlik kafolatlari va ko‘mak olishi kerak.
Buyuk Britaniya birinchi bo'lib Ukrainani uzoq masofaga uchuvchi qurollar bilan ta’minlashga rozi bo‘ldi va Niderlandiya bilan birgalikda “havo koalitsiyasi”ga asos solgan davlatlardan biriga aylandi.
Izoh (0)