Буюк Британияда Зеленский номидаги кўча очилди

Буюк Британияда Украина президенти Владимир Зеленский номидаги кўча очилди, деб хабар бермоқда BBC.

“Эссекс графлигидаги кўча Буюк Британиянинг Украина президенти Владимир Зеленский номидаги биринчи йўли сифатида расман очилди. Харлоудаги Бешинчи авеню номи ‘Бешинчи авеню — Зеленский авенюси’ деб қайта ёзилди”, — дейилган нашр хабарида.

Қайд этилишича, очилишда Украинанинг Буюк Британиядаги элчиси Вадим Пристайко иштирок этиши керак эди, бироқ тадбирдан бир неча дақиқа олдин Зеленский элчини ишдан бўшатганини маълум қилган.

Эссексдаги кўчага янги ном белгисини Харлоу депутати Роберт Хелфон намойиш этди. Унинг таъкидлашича, шаҳар Украина раҳбарига шараф кўрсатиш учун муносиб жой, чунки Харлоу Иккинчи жаҳон урушидан кейин кўчирилган лондонлик оилаларга атаб қурилган.

Хелфоннинг сўзларига кўра, янги Харлоу шаҳри “нолдан” кўтарилган, шунинг учун ҳозирги воқеа украиналиклар Россияни мағлуб этганида “уларда гўзал янги шаҳарлар пайдо бўлишига умид борлигини” кўрсатиши керак.

Депутат, шунингдек, Россия босқинидан кейин 70 га яқин украиналик қочқинларни уй-жой ва бошқа турдаги ёрдам билан қўллаб-қувватлаган маҳаллий аҳолини мақтади.

Буюк Британия Украинага мунтазам ёрдам бермоқда

Буюк Британия Россия босқинининг дастлабки кунларидан бери Украинага катта ёрдам кўрсатиб келмоқда. 2022 йил 24 август куни Украина президенти Владимир Зеленский Буюк Британиянинг ўша пайтдаги бош вазири Борис Жонсонни “Озодлик” ордени билан тақдирлаганди – бу Украинада хорижликларга берилиши мумкин бўлган энг олий мукофотдир.

Уруш давомида Жонсон Киевга уч маротаба келди ва Украинани қўллаб-қувватлашини қайта тасдиқлаб, Британиядан ёрдам пакетини эълон қилди.

Британиянинг янги бош вазири Риши Сунак Украина учун хавфсизлик кафолатларини ишлаб чиқиш тарафдори эканини айтади. Унга кўра, Украина НАТОга киришдан олдин Ғарбдан узоқ муддатли хавфсизлик кафолатлари ва кўмак олиши керак.

Буюк Британия биринчи бўлиб Украинани узоқ масофага учувчи қуроллар билан таъминлашга рози бўлди ва Нидерландия билан биргаликда “ҳаво коалицияси”га асос солган давлатлардан бирига айланди.