O‘zbekistonda 2023-yilning birinchi yarim yilligida xalqaro moliya institutlari va xorijiy hukumat moliya tashkilotlari bilan 17 ta loyiha doirasida umumiy qiymati 2,3 milliard dollarlik qarz bitimlari imzolandi. Bu haqda Strategik rivojlanish va tahlil departamenti xabar berdi.
Xususan:
- Islom taraqqiyot banki bilan 260 million dollarlik “Qishloq joylarini barqaror rivojlantirish” loyihasi;
- Yevropa tiklanish va taraqqiyot banki bilan 199,9 million dollarlik “118 ta nasos stansiyalarini modernizatsiya qilish” loyihasi.
Ushbu mablag‘lar energetika, qishloq va shaharlar infratuzilmasini rivojlantirish, sport inshootlarini barpo etish, chorvachilik, transport va boshqa sohalarni rivojlantirishga yo‘naltirilgan.
Xalqaro moliya institutlari va xorijiy hukumat moliya tashkilotlaridan o‘zlashtirilgan mablag‘larning asosiy qismi Jahon banki, Xitoy banklari, Osiyo taraqqiyot banki, Yevropa tiklanish va taraqqiyot banki hissalariga to‘g‘ri keladi.
“O‘zlashtirilgan mablag‘lar asosan transport infratuzilmasi, kommunal xo‘jalikka, qishloq va suv xo‘jaligi, energetika, shahar va qishloqlar infratuzilmasini yaxshilash, taʼlim va boshqa sohalarga yo‘naltirildi”, — deyiladi xabarda.
Qayd etilishicha, yanvar—iyun oylarida jami 7,4 milliard dollar xorijiy investitsiyalar o‘zlashtirilgan. To‘g‘ridan to‘g‘ri xorijiy investitsiyalar va kreditlarning 2,9 milliard dollari tarmoq hamda 4 milliard dollari hududiy loyihalar hisobidan amalga oshirilgan.
Shu bilan birga, birinchi yarim yillikda 7,5 milliard dollarlik tovar va xizmatlar eksporti amalga oshirilib, o‘tgan yilning mos davriga nisbatan 17 foizga o‘sishga erishilgan.
Mablag‘larning sarflanishi
Iyun boshlarida Osiyo taraqqiyot banki mablag‘lari hisobidan Surxondaryo viloyatidagi 4R105 Darband—Boysun—Elbayon avtomobil yo‘lining 5–70-kilometr (65 kilometr) qismini va 4R100 Mang‘uzor—Jarqo‘rg‘on—Bandixon—Oltinsoy—Denov avtomobil yo‘lining 128–174-kilometr (46 kilometr) qismini rekonstruksiya qilish loyihasi amalga oshirilayotgani ma’lum bo‘lgandi. Loyiha doirasida rekonstruksiya qilinadigan avtomobil yo‘lining umumiy uzunligi 111 kilometrni tashkil etadi.
Shuningdek, Surxondaryo (Sherobod), Samarqand (Kattaqo‘rg‘on) va Jizzax (G‘allaorol) viloyatlarida 3 ta yirik quyosh fotoelektr stansiyasini qurish va boshqarish uchun Masdar kompaniyasi YTTB bilan 127 million dollar, OTB bilan 102 million dollar va ularning hamkor banklari bilan 167 million dollar miqdorida shartnomalar imzolagan edi.
Izoh (0)