Surxondaryoda Toshkentga qatnov yo‘lini salkam 150 kilometrga qisqartiradigan yangi yo‘l qurilmoqda

Surxondaryo viloyatida xalqaro ahamiyatga ega ikkita trassani birlashtiruvchi va Toshkentga yuklar yetkazilish vaqtini qisqartirishga xizmat qiluvchi yangi yo‘l qurilmoqda. Bu haqda Transport vazirligi xabar berdi.

Qayd etilishicha, yangi yo‘l М39 va M41 avtomagistrallarini qisqa masofada birlashtiradi.

OTB mablag‘lari hisobidan Surxondaryo viloyatidagi 4R105 Darband—Boysun—Elbayon avtomobil yo‘lining 5–70-kilometr (65 kilometr) qismini va 4R100 Mang‘uzor—Jarqo‘rg‘on—Bandixon—Oltinsoy—Denov avtomobil yo‘lining 128–174-kilometr (46 kilometr) qismini rekonstruksiya qilish loyihasi amalga oshirilmoqda. Loyiha doirasida rekonstruksiya qilinadigan avtomobil yo‘lining umumiy uzunligi 111 kilometrni tashkil etadi.

Mazkur avtomobil yo‘llarini rekonstruksiya qilinishi bilan Surxondaryo viloyati hududidan o‘tuvchi xalqaro ahamiyatdagi M39 va M41 avtomagistrallari qisqa masofada birlashtirilib, Toshkent shahriga qatnovni amalga oshirayotgan xalqaro va mahalliy avtotashuvchilar uchun mavjud 298 kilometr uzunlikdagi avtomobil yo‘li 146 kilometr qisqartiriladi va natijada masofa 152 kilometrni tashkil etadi.

Surxondaryoda prezident mashina haydagan nosoz yo‘l

Shavkat Mirziyoyev mart o‘rtalarida Surxondaryoga borganida Boysun—Denov yo‘nalishidagi yo‘llar sifati bo‘yicha odamlardan tushayotgan e’tirozlarni inobatga olib, o‘zi avtomobil haydab ko‘rgandi. O‘shanda prezident Surxondaryo viloyati hokimiga ushbu yo‘llarni ta’mirlash bo‘yicha topshiriq bergan va oradan ko‘p o‘tmay ishlar boshlab yuborilgandi.

Ma’lumotlarga ko‘ra, Surxondaryo viloyatidagi 4R-105 Darband—Boysun—Elbayon avtomobil yo‘lining 5-70 kilometr qismini va 4R-100 Mang‘uzor—Jarqo‘rg‘on—Bandixon—Oltinsoy—Denov avtomobil yo‘lining 128–174 kilometr qismini (jami 111 kilometr) rekonstruksiya qilish loyihasi Osiyo taraqqiyot banki mablag‘lari hisobidan amalga oshiriladi.