Ўзбекистонда 2023 йилнинг биринчи ярим йиллигида халқаро молия институтлари ва хорижий ҳукумат молия ташкилотлари билан 17 та лойиҳа доирасида умумий қиймати 2,3 миллиард долларлик қарз битимлари имзоланди. Бу ҳақда Стратегик ривожланиш ва таҳлил департаменти хабар берди.
Хусусан:
- Ислом тараққиёт банки билан 260 миллион долларлик “Қишлоқ жойларини барқарор ривожлантириш” лойиҳаси;
- Европа тикланиш ва тараққиёт банки билан 199,9 миллион долларлик “118 та насос станцияларини модернизация қилиш” лойиҳаси.
Ушбу маблағлар энергетика, қишлоқ ва шаҳарлар инфратузилмасини ривожлантириш, спорт иншоотларини барпо этиш, чорвачилик, транспорт ва бошқа соҳаларни ривожлантиришга йўналтирилган.
Халқаро молия институтлари ва хорижий ҳукумат молия ташкилотларидан ўзлаштирилган маблағларнинг асосий қисми Жаҳон банки, Хитой банклари, Осиё тараққиёт банки, Европа тикланиш ва тараққиёт банки ҳиссаларига тўғри келади.
“Ўзлаштирилган маблағлар асосан транспорт инфратузилмаси, коммунал хўжаликка, қишлоқ ва сув хўжалиги, энергетика, шаҳар ва қишлоқлар инфратузилмасини яхшилаш, таълим ва бошқа соҳаларга йўналтирилди”, — дейилади хабарда.
Қайд этилишича, январь—июнь ойларида жами 7,4 миллиард доллар хорижий инвестициялар ўзлаштирилган. Тўғридан тўғри хорижий инвестициялар ва кредитларнинг 2,9 миллиард доллари тармоқ ҳамда 4 миллиард доллари ҳудудий лойиҳалар ҳисобидан амалга оширилган.
Шу билан бирга, биринчи ярим йилликда 7,5 миллиард долларлик товар ва хизматлар экспорти амалга оширилиб, ўтган йилнинг мос даврига нисбатан 17 фоизга ўсишга эришилган.
Маблағларнинг сарфланиши
Июнь бошларида Осиё тараққиёт банки маблағлари ҳисобидан Сурхондарё вилоятидаги 4Р105 Дарбанд—Бойсун—Элбаён автомобиль йўлининг 5–70-километр (65 километр) қисмини ва 4Р100 Манғузор—Жарқўрғон—Бандихон—Олтинсой—Денов автомобиль йўлининг 128–174-километр (46 километр) қисмини реконструкция қилиш лойиҳаси амалга оширилаётгани маълум бўлганди. Лойиҳа доирасида реконструкция қилинадиган автомобиль йўлининг умумий узунлиги 111 километрни ташкил этади.
Шунингдек, Сурхондарё (Шеробод), Самарқанд (Каттақўрғон) ва Жиззах (Ғаллаорол) вилоятларида 3 та йирик қуёш фотоэлектр станциясини қуриш ва бошқариш учун Masdar компанияси ЕТТБ билан 127 миллион доллар, ОТБ билан 102 миллион доллар ва уларнинг ҳамкор банклари билан 167 миллион доллар миқдорида шартномалар имзолаган эди.
Изоҳ (0)