“Чироқларни ўчиринг, рухсат сўрашим лозим, бошловчи керак эмас” — Статистика агентлиги директори Баҳодир Бегаловнинг “Дарё” студиясидаги инжиқликлари ҳақида

Иқтисодчи блогер Отабек Бакиров ўзининг Telegram’даги каналида Статистика агентлиги томонидан Минимал истеъмол харажатлари эълон қилингани ортидан келтирилган рақамларни сўроқ остига олиб, “Ўзбекистон камбағаллари янада камбағаллашдими?”, “Бу нима дегани?”, “Ҳурматли, Статагентлик”, “Статагентликка таклиф: хўп, мен айбдор бўлай, лекин сиз аввал камбағалларнинг 6 ойлик ҳақини қайтаринг” номли туркум материаллар эълон қилди.

Бунга жавобан Статистика агентлиги эса “Ортиқча шов-шувга берилиш – илмсизликдан далолат” номли мақола билан муносабат билдирди. Жавоб материали шундай бошланади: “Ҳурматли Отабек Бакиров, доимий тарзда Статистика агентлиги томонидан эълон қилиб борилаётган мамлакатимизнинг расмий ижтимоий-иқтисодий статистик кўрсаткичларига асоссиз, юзаки танқидлар, масаланинг ичига тўлиқ кирмасдан, тушуниб таҳлил қилмасдан ёндашиб, муносабат бериб келасиз. Агар танқид асосли ва энг муҳими тўғри бўлса, марҳамат, бунга ортиқча эътироз йўқ”.

“Дарё” интернет нашри кенг жамоатчилик қизиқиш билдираётган иқтисодчи ва Статистика агентлиги ўртасидаги муносабатга юзма-юз ўтириб ойдинлик киритиш мақсадида майдон яратиб, иккисини ҳам суҳбатга чақирди. Ва бунга икки томон ҳам розилигини билдирди.

Статистика агентлиги раҳбарининг “Дарё” сўровига лаббай деб жавоб бергани, албатта, қувонарли ҳол бўлди. Боиси ҳукумат амалдорлари орасида юрак ютиб, ҳар қандай саволга жавоб беришга тайёрлари кам. Бошқа жиҳатдан, Статистика агентлиги директорининг чиқиши ОАВга ёпиқ бўлган бошқа раҳбарларга намуна бўлиши турган гап эди.

Афсуски, бундай бўлиб чиқмади...

“Рухсат сўрашим керак”

“Дарё” нашри келишувга кўра, меҳмонларга 20 июль куни соат 16:00 га суҳбатни тасвирга олиш учун студия тайёрлаб қўйди. Айтилган вақтдан чамаси 30 дақиқа ўтиб, Статистика агентлиги директори Баҳодир Бегалов ўнлаб ходимлари билан студияга кириб келиб, бошловчидан раҳбарни сўрайди ва нашр бош муҳаррири билан гаплашади.

Баҳодир Бегалов агентлик раҳбари экани ва шу боис бирор ОАВда чиқиш қилишдан аввал юқоридан рухсат кераклигини айтади. Шу ўринда “тепанинг рухсатисиз чиқиш қилолмайдиган амалдор суҳбатга нега рози бўлди-ю, нега студияга келди?” деган табиий савол туғилади. Катта идорада раҳбар бўлиб ишловчи шахснинг ғалати хатти-ҳаракатлари бу билан тугамади...

“Чироқларни ўчиринг”

Суҳбатни рад этган Баҳодир Бегалов студиядаги махсус чироқларни ўчириб қўйишни сўрайди. Унга чироқлар нега халал бераётгани сўралганда эса у “мен бу ерга интервью беришга эмас, Отабек Бакиров билан очиқ мулоқот қилишга келдим”, деб жавоб қайтарди. Ваҳоланки, жаноб Бегалов қаерга ва нима мақсадда таклиф этилганини жуда яхши билар, “Дарё” саволларига жавоб бериш учун бутун жамоаси билан келган эди. Шундай бўлса-да, у чироқлари ўчирилган қоронғи студияда иқтисодчи блогер билан айнан нима ҳақда “очиқ мулоқот” қилиб олмоқчи бўлгани жумбоқлигича қолди.

“Бошловчи керак эмас”

Нима хоҳлаётганини тушунтирмаётган Баҳодир Бегалов суҳбат учун тайёрлаб қўйилган стулга ўтириш чоғида суҳбатни олиб борувчи журналистга қарата: “Сиз чиқиб кетинг, бизга бошловчи керак эмас”, дея шарт қўйди. Унга бу ер унинг ишхонаси эмаслиги ва журналистга топшириқ ёки буйруқ беришга ваколати йўқ экани тушунтирилгач, студияни тарк этди.

“Дарё” нашри масалани ўзаро конструктив мулоқот ўрнатиш йўли билан ҳал қилиш мақсадида жамоатчилик учун очиқ бўлган майдон яратиш вазифасини ўз олдига мақсад қилган.

Нашр қайсидир блогерни давлат амалдорига “ушлаб бериб”, қоронғи хоналарда ёпиқ эшиклар ортида ўртадаги низони “разбор” қиладиган жой эмас. Табиийки, буни ўзини ва ўзгаларни ҳурмат қиладиган, маданиятли шахс тушунади. Хусусан, Баҳодир Бегалов ҳам ўзи учун хулоса қилади, деган умиддамиз.