Tesla жорий йилнинг иккинчи чорагида рекорд даражада электромобиль сотди

Tesla иккинчи чорак натижаларини эълон қилди, бу бир қатор кўрсаткичлар бўйича рекорд даражадаги ва таҳлилчилар кутганидан юқори бўлди.

Ҳисобот давридаги даромад ўтган йилнинг иккинчи чорагига нисбатан 45 фоизга ўсди ва рекорд даражадаги 24,9 миллиард долларни ташкил этди. Таҳлилчилар эса 24,47 миллиард долларни прогноз қилган эдилар.

Ҳар бир акция учун даромад 0,91 долларни ташкил қилди (кутилгани 0,82 доллар эди). Соф фойда 2022 йилнинг шу даврига нисбатан 20 фоизга ўсди ва 2,7 миллиард долларга етди.

Tesla ўз моделлари нархларини пасайтириши ва мижозлар учун фойдали бўлган бошқа битимларни амалга ошириши сабабли даромадлар кўтарилди. Бироқ, худди шу сабабга кўра, ялпи маржа кутилган 18,8% нисбатан 18,2% ни ташкил этди. Бу кўрсаткич жорий йилнинг биринчи чорагига (19,3%), шинингдек, 2022 йилнинг тўртинчи чорагига (24%) нисбатан пастроқ бўлди.

Операсион рентабеллик ҳам камайиб, 5 фоизни ташкил қилди (2022 йилда 9,6 фоиз бўлган). Аммо нархларни пасайтириш туфайли Tesla бутун дунё бўйлаб рекорд даражада — 466 140 та электромобиль сота олди, бу ўтган йилнинг шу даврига нисбатан деярли икки баравар кўп.

Компания, шунингдек, Tesla моделларида автопилот тизимини такомиллаштириш учун зарур бўлган Дожо суперкомпьютерини яратиш учун 2024 йил охиригача 1 миллиард доллардан ортиқ сармоя киритишини маълум қилди. Дожо катта ҳажмдаги маълумотларни, жумладан Tesla электромобиллари видеоларини қайта ишлашга қодир ҳисобланади.