Xitoyning birinchi qayta foydalansa bo‘ladigan kosmik kemasi 2027-yildayoq uchiriladi. Ochiq koinotga chiqqan birinchi xitoylik taykonavt Yan Livey bunga ishonch bildirdi. Uning so‘zlarini The South China Morning Post nashri keltirdi.
Mutaxassisning fikricha, kema “kelajakda Xitoy kosmik stansiyasini qurish va Oyga qo‘nishda muhim rol o‘ynaydi”. U yettita taykonavtni tashish imkoniyatiga ega bo‘lishi kutilmoqda. Kema ham Yerga yaqin orbitaga parvoz qilish uchun, ham koinotni chuqur o‘rganish uchun mo‘ljallangan, deb yozadi gazeta.
To‘liq o‘lchamli prototip 2020-yilda Long March 5 raketasi yordamida 67 soatlik sinov parvozini muvaffaqiyatli yakunlagan edi, deb yozdi nashr. Xabarga ko‘ra, kemaning asosiy qismlari ketma-ket 10 martagacha ishlatilishi mumkin, bu esa uchirish xarajatlarini sezilarli darajada kamaytiradi. Dpa maʼlumotlariga ko‘ra, qurilma SpaceX’ning Dragon V2 qurilmasidan taxminan ikki baravar katta va og‘irroq bo‘ladi.
Xitoy 2030-yilgacha Oyga taykonavtlarni yubormoqchi.
Avvalroq Hindiston koinot agentligi Oyning janubiy qutbiga lunoxodni olib chiqishi kerak bo‘lgan raketani muvaffaqiyatli uchirgani xabar qilingan edi. Puxta rejalashtirilgan bir qator manyovrlardan so‘ng, kema 23-avgust kuni Oyning janubiy qutbi yaqiniga qo‘nishi kutilmoqda.
Izoh (0)