Хитойнинг биринчи қайта фойдаланса бўладиган космик кемаси 2027 йилдаёқ учирилади. Очиқ коинотга чиққан биринчи хитойлик тайконавт Ян Ливэй бунга ишонч билдирди. Унинг сўзларини The South China Morning Post нашри келтирди.
Мутахассиснинг фикрича, кема “келажакда Хитой космик станциясини қуриш ва Ойга қўнишда муҳим рол ўйнайди”. У еттита тайконавтни ташиш имкониятига эга бўлиши кутилмоқда. Кема ҳам Ерга яқин орбитага парвоз қилиш учун, ҳам коинотни чуқур ўрганиш учун мўлжалланган, деб ёзади газета.
Тўлиқ ўлчамли прототип 2020 йилда Long March 5 ракетаси ёрдамида 67 соатлик синов парвозини муваффақиятли якунлаган эди, деб ёзди нашр. Хабарга кўра, кеманинг асосий қисмлари кетма-кет 10 мартагача ишлатилиши мумкин, бу эса учириш харажатларини сезиларли даражада камайтиради. Дпа маълумотларига кўра, қурилма SpaceX’нинг Dragon V2 қурилмасидан тахминан икки баравар катта ва оғирроқ бўлади.
Хитой 2030 йилгача Ойга тайконавтларни юбормоқчи.
Аввалроқ Ҳиндистон коинот агентлиги Ойнинг жанубий қутбига луноходни олиб чиқиши керак бўлган ракетани муваффақиятли учиргани хабар қилинган эди. Пухта режалаштирилган бир қатор манёврлардан сўнг, кема 23 август куни Ойнинг жанубий қутби яқинига қўниши кутилмоқда.
Изоҳ (0)