Saudiya Arabistoni valiahd shahzodasi Muhammad bin Salmon va Birlashgan Arab Amirliklari (BAA) prezidenti Muhammad bin Zayd al-Nahayon ilgari yaqin bo‘lganiga qaramay, endilikda ular Yaqin Sharqda yetakchilik uchun raqobatchiga aylandi, deb yozmoqda The Wall Street Journal (WSJ).
Gazeta o‘z manbalariga tayanib, dekabr oyida bin Salmon BAA Saudiya Arabistoniga “orqadan pichoq urganini” aytganiga ishora qildi. Shu bilan birga, Saudiya Arabistoni rahbari BAAni Yaman va OPEKdagi siyosati uchun “jazolash” bilan tahdid qilgan.
Boshqa manbalarga ko‘ra, al-Nahayon bin Salmonning hokimiyat tepasiga kelishi, neft siyosatida Rossiya bilan yaqinlashishi va Eron bilan diplomatik kelishuv kabi tavakkalchilik harakatlaridan norozi. WSJ qayd etishicha, Saudiya shahzodasi va BAA prezidenti olti oydan ortiq vaqtdan beri gaplashmagan.
Nashr ikki davlat raqobat qiladigan yoki kelishmovchilikka boradigan sohalar orasida iqtisodiyot va Yamandagi mojaro bo‘yicha pozitsiyalardagi farqni keltirdi.
Yetakchilar raqobati Vashingtonda xavotir uyg‘otmoqda.
“Bu ikki yuqori ambitsiyali insonlar mintaqada asosiy rolni o‘ynashni istaydi. Qaysidir darajada ular hali ham hamkorlik qilmoqda. Ammo aftidan, endi ular bir-birining obro‘sini xushlamayotgandek. Oxir oqibat, ular bir-birining yoqasiga chang solishi bizga foyda keltirmaydi”, — dedi gazetaning AQSH ma’muriyatidagi manbasi.
Har ikki mamlakat vakillari WSJ’ga bergan rasmiy bayonotida kelishmovchiliklarni rad etdi. BAA bunday da’volar yolg‘on va asossiz deb atadi. Saudiya Arabistoni esa bu ma’lumotlarni noto‘g‘ri hisoblab, Abu-Dabi “yaqin hamkor” ekanini ta’kidladi. Ikkala davlatda ham siyosatda umumiy qarashlar mavjudligi qayd etildi.
Izoh (0)