Yevropa Komissiyasi matbuot kotibi Peter Stanoning “Izvestiya” nashriga aytishicha, Turkiya 2024-yilda Yevropa Ittifoqiga a’zo bo‘lmaydi. Uning ta’kidlashicha, Yevropa Ittifoqiga kirish jarayoni “yillarni talab qiladi”.
Turkiya 1987-yilda Yevropa Ittifoqiga a’zolik uchun ariza bergan va 1999-yilda nomzod maqomini olgan. Qo‘shilish bo‘yicha muzokaralar faqat 2005-yilda boshlangan. Bu masalani muhokama qilish, jumladan, Yevropa Ittifoqi pozitsiyasiga ko‘ra, so‘z erkinligini buzadigan bir qator turk qonunlari sababli murakkablashadi.
Stano, shuningdek, Yevropa Ittifoqi Turkiyaga vizasiz rejim taqdim etishga hali tayyor emasligini bildirdi.
“Viza rejimini liberallashtirish qarori a’zo davlatlar tomonidan mamlakat inson huquqlari va siyosiy erkinliklarni o‘z ichiga olgan barcha zarur mezonlarni bajarganidan keyin qabul qilinadi”, — dedi u.
Avvalroq Turkiya prezidenti Rajab Toyyib Erdo‘g‘on Anqara Shvetsiyaning NATOga a’zo bo‘lishi masalasida yaqin vaqt ichida kelishib olishga tayyorligini, biroq buning evaziga mamlakatning Yevropa Ittifoqiga kirish jarayonini faollashtirmoqchi ekanligini ma’lum qilgandi.
Bunga javoban NATO va Yevropa Ittifoqi Erdo‘g‘onning bu ikki jarayonni bog‘lash istagi o‘rinsiz ekanini ta’kidladi. Keyinroq NATO bosh kotibi Yens Stoltenberg Turkiya Shvetsiyaning alyansga kirishini ma’qullashga rozi bo‘lganini ma’lum qildi. Shvetsiya, o‘z navbatida, Turkiyaning Yevropa Ittifoqiga qo‘shilishini qo‘llab-quvvatlashga va’da berdi.
Izoh (0)