Davlat xavfsizlik xizmati respublikaning qator viloyatlarida giyohvandlik vositalarining noqonuniy aylanmasiga chek qo‘ydi.
Xususan, DXXning Sirdaryo viloyati bo‘yicha boshqarmasi xodimlari tomonidan boshqa huquqni muhofaza qiluvchi idoralar bilan hamkorlikda Toshkent viloyatining Ohangaron tumanida joylashgan “Chinor” YPX maskanida o‘tkazilgan tezkor tadbirda, Farg‘ona viloyati tomon harakatlanayotgan Gentra rusumli avtomashina to‘xtatilib, ko‘zdan kechirilgan.
Natijada, unda yo‘lovchi sifatida ketayotgan Farg‘ona tumanida yashovchi, 1986-yilda tug‘ilgan, muqaddam sudlangan fuqaroning qo‘l sumkasida 981 gramm gashish moddasi borligi aniqlanib, protsessual tartibda rasmiylashtirib olingan.
Boshqa holatda esa Qo‘qon shahrida yashovchi, 1971-yilda tug‘ilgan muqaddam sudlangan fuqaro Toshkent shahrining Bektemir tumanida ushlanib, undan 1 kilogramm 76 gramm gashish moddasi protsessual tartibda rasmiylashtirib olingan.
Aniqlanishicha, mazkur shaxs tojikistonlik narkokuryerlar tomonidan kontrabanda yo‘li bilan Toshkent viloyati hududiga o‘tkazilib, xufiya joyga yashirib ketilgan ushbu giyohvandlik moddalarini Toshkent shahriga olib ketayotgan bo‘lgan.
Davlat xavfsizlik xizmatining Farg‘ona viloyati bo‘yicha boshqarmasi va viloyat bojxona boshqarmasi xodimlari hamkorligida o‘tkazilgan tezkor tadbirda, Farg‘ona tumanida yashovchi, 26 yoshli fuqaro 495 gramm gashish moddasini 5 ming dollarga sotayotgan vaqtida ushlangan.
Tezkor surishtiruv harakatlari davomida, Qirg‘izistondan kontrabanda yo‘li bilan keltirilgan mazkur narkotikning haqiqiy egasi – Farg‘ona tumanida yashovchi, 1997-yilda tug‘ilgan boshqa shaxs ekani aniqlanib, u ham qo‘lga olingan.
Davlat xavfsizlik xizmatining Namangan viloyati bo‘yicha boshqarmasi xodimlari tomonidan boshqa huquqni muhofaza qiluvchi idoralar bilan hamkorlikda Chust tumanida o‘tkazilgan tezkor tadbirda, Namangan shahrida yashovchi 39 yoshli fuqaro boshqaruvidagi “Jiguli” rusumli avtomashina to‘xtatilib, ko‘zdan kechirilgan.
Natijada, avtomashina salonida bo‘lgan Farg‘ona viloyatining Rishton tumanida yashovchi, muqaddam sudlangan, 24 yoshli ayolning qo‘l sumkasida 305 gramm gashish moddasi borligi aniqlanib, o‘rnatilgan tartibda rasmiylashtirib olingan.
Shuningdek, avtomashinada Namangan shahrida yashovchi, muqaddam sudlangan 39 yoshli fuqaro ham borligi maʼlum bo‘lgan. Tergovga qadar tekshiruv harakatlari davomida, ushbu uch nafar fuqaro Tojikistondan keltirilgan narkotik moddani Qo‘qon shahridan Namangan shahriga olib ketayotganliklari aniqlangan.
Hozirda barcha holatlar yuzasidan mazkur shaxslarga nisbatan Jinoyat kodeksining tegishli moddalari bilan jinoyati ishlari qo‘zg‘atilib, tergov harakatlari olib borilmoqda.
Giyohvand moddalar savdosi
Mart oyi o‘rtalarida DXX Chegara qo‘shinlari va Namangan viloyati bo‘yicha boshqarmasi harbiy xizmatchilari tomonidan olib borilgan tezkor-qidiruv tadbirlarida katta miqdordagi narkotik moddalarning o‘zbek—qirg‘iz davlat chegarasidan noqonuniy o‘tkazilgan holati aniqlangandi.
Shuningdek, Navoiy viloyatida narkotik moddalar savdosi bilan shug‘ullanuvchi jinoiy guruh qo‘lga olingani, Toshkentda giyohvand moddalar savdosi bilan shug‘ullangan talabalar ushlangani, shuningdek, Samarqanddagi tungi klubda 10 ming AQSH dollari evaziga giyohvand modda sotishga uringanlar qo‘lga tushgani to‘g‘risida xabar berilgandi.
Izoh (0)