Давлат хавфсизлик хизмати республиканинг қатор вилоятларида гиёҳвандлик воситаларининг ноқонуний айланмасига чек қўйди.
Хусусан, ДХХнинг Сирдарё вилояти бўйича бошқармаси ходимлари томонидан бошқа ҳуқуқни муҳофаза қилувчи идоралар билан ҳамкорликда Тошкент вилоятининг Оҳангарон туманида жойлашган “Чинор” ЙПХ масканида ўтказилган тезкор тадбирда, Фарғона вилояти томон ҳаракатланаётган Gentra русумли автомашина тўхтатилиб, кўздан кечирилган.
Натижада, унда йўловчи сифатида кетаётган Фарғона туманида яшовчи, 1986 йилда туғилган, муқаддам судланган фуқаронинг қўл сумкасида 981 грамм гашиш моддаси борлиги аниқланиб, процессуал тартибда расмийлаштириб олинган.
Бошқа ҳолатда эса Қўқон шаҳрида яшовчи, 1971 йилда туғилган муқаддам судланган фуқаро Тошкент шаҳрининг Бектемир туманида ушланиб, ундан 1 килограмм 76 грамм гашиш моддаси процессуал тартибда расмийлаштириб олинган.
Аниқланишича, мазкур шахс тожикистонлик наркокурьерлар томонидан контрабанда йўли билан Тошкент вилояти ҳудудига ўтказилиб, хуфия жойга яшириб кетилган ушбу гиёҳвандлик моддаларини Тошкент шаҳрига олиб кетаётган бўлган.
Давлат хавфсизлик хизматининг Фарғона вилояти бўйича бошқармаси ва вилоят божхона бошқармаси ходимлари ҳамкорлигида ўтказилган тезкор тадбирда, Фарғона туманида яшовчи, 26 ёшли фуқаро 495 грамм гашиш моддасини 5 минг долларга сотаётган вақтида ушланган.
Тезкор суриштирув ҳаракатлари давомида, Қирғизистондан контрабанда йўли билан келтирилган мазкур наркотикнинг ҳақиқий эгаси – Фарғона туманида яшовчи, 1997 йилда туғилган бошқа шахс экани аниқланиб, у ҳам қўлга олинган.
Давлат хавфсизлик хизматининг Наманган вилояти бўйича бошқармаси ходимлари томонидан бошқа ҳуқуқни муҳофаза қилувчи идоралар билан ҳамкорликда Чуст туманида ўтказилган тезкор тадбирда, Наманган шаҳрида яшовчи 39 ёшли фуқаро бошқарувидаги “Жигули” русумли автомашина тўхтатилиб, кўздан кечирилган.
Натижада, автомашина салонида бўлган Фарғона вилоятининг Риштон туманида яшовчи, муқаддам судланган, 24 ёшли аёлнинг қўл сумкасида 305 грамм гашиш моддаси борлиги аниқланиб, ўрнатилган тартибда расмийлаштириб олинган.
Шунингдек, автомашинада Наманган шаҳрида яшовчи, муқаддам судланган 39 ёшли фуқаро ҳам борлиги маълум бўлган. Терговга қадар текширув ҳаракатлари давомида, ушбу уч нафар фуқаро Тожикистондан келтирилган наркотик моддани Қўқон шаҳридан Наманган шаҳрига олиб кетаётганликлари аниқланган.
Ҳозирда барча ҳолатлар юзасидан мазкур шахсларга нисбатан Жиноят кодексининг тегишли моддалари билан жинояти ишлари қўзғатилиб, тергов ҳаракатлари олиб борилмоқда.
Гиёҳванд моддалар савдоси
Март ойи ўрталарида ДХХ Чегара қўшинлари ва Наманган вилояти бўйича бошқармаси ҳарбий хизматчилари томонидан олиб борилган тезкор-қидирув тадбирларида катта миқдордаги наркотик моддаларнинг ўзбек—қирғиз давлат чегарасидан ноқонуний ўтказилган ҳолати аниқланганди.
Шунингдек, Навоий вилоятида наркотик моддалар савдоси билан шуғулланувчи жиноий гуруҳ қўлга олингани, Тошкентда гиёҳванд моддалар савдоси билан шуғулланган талабалар ушлангани, шунингдек, Самарқанддаги тунги клубда 10 минг АҚШ доллари эвазига гиёҳванд модда сотишга уринганлар қўлга тушгани тўғрисида хабар берилганди.
Изоҳ (0)