Myunxenning “Bavariya” jamoasi 2023/24-yilgi mavsumga tayyorgarlik ko‘rmoqda.
Myunxenliklar yangi mavsumga tayyorgarlik davomida 18-iyul, seshanba kuni Germaniya 9-divizionida harakat qiluvchi “Rottax-Egern” jamoasiga qarshi o‘rtoqlik o‘yini o‘tkazdi.
Birinchi bo‘limda “Bavariya” 18 ta gol urdi: Matis Tel va Jamal Musialalar penta-trik qayd etgan bo‘lsa, Serj Gnabri uchta golga mualliflik qildi. Leroy Sane, Dayo Upamenkano, Nussair Mazraui, Konrad Laymer va Alfonso Devislar bittadan golni o‘z hisobiga yozdirib qo‘ydi.
Ikkinchi bo‘limda esa Marsel Zabitser beshta gol urdi. Rafael Gerreyru, Rayan Gravenberx, Kingsli Koman va Sadio Mane ham maydonni golsiz tark etmadi.
Jamoasining g‘alabasidan so‘ng Tuxel o‘z fikrlarini bildirib o‘tdi: “Biz 27:0 hisobida g‘alaba qozongan bo‘lsak-da, natijadan qoniqmadim. Bundan-da ko‘proq gol urishimiz mumkin edi. Ikkinchi bo‘limni yaxshi o‘tkazmadik”.
“Rottax-Egern” bunday natijaga oldindan tayyor bo‘lgan. Chunki ushbu klub Germaniya chempioni bilan birinchi bor o‘ynayotgani yo‘q. Myunxenliklar so‘nggi yillarda uch marta “Rottax-Egern”ga qarshi bahs olib bordi va barchasida kamida 20 ta gol urdi.
2018-yilda “Rottax-Egern” 20 ta gol o‘tkazib yuborgan va raqib darvozasiga 2 ta gol urishga muvaffaq bo‘lgandi. 2019-yildagi uchrashuv myunxenliklarning 23:0 hisobidagi g‘alabasi bilan yakunlangan. 2023-yilda esa rekordmayster raqib darvozasiga javobsiz 27 ta gol urmoqda.
Jamolar o‘rtasidagi o‘zaro uchrashuvlarda umumiy hisob — 70:2 Myunxen klubi foydasiga.
Yirik hisobdagi mag‘lubiyatlarga qaramasdan, “Rottax-Egern” yana “Bavariya” bilan o‘yinlarga rozi bo‘laveradi. Chunki bu kamtargina klubning top-futbolchilarga qarshi kuchini sinab ko‘rishga imkoniyat. Kichkina shaharcha uchun esa “Bavariya”ning kelishi katta hodisa.
Ushbu uchrashuvga chiptalar ham demokratik narxlarda sotilgan. Kattalar uchun — 10 yevro, bolalar uchun esa 5 yevro.
Izoh (0)