“Бавария” ўртоқлик ўйинида рақибини 27:0 га мағлуб этди. Мюнхенликлар ушбу жамоага қарши сўнгги учта ўйинда 70 та гол урган (видео)

Мюнхеннинг “Бавария” жамоаси 2023/24 йилги мавсумга тайёргарлик кўрмоқда.

Мюнхенликлар янги мавсумга тайёргарлик давомида 18 июль, сешанба куни Германия 9-дивизионида ҳаракат қилувчи “Роттах-Эгерн” жамоасига қарши ўртоқлик ўйини ўтказди. 

Биринчи бўлимда “Бавария” 18 та гол урди: Матис Тель ва Жамал Мусиалалар пента-трик қайд этган бўлса, Серж Гнабри учта голга муаллифлик қилди. Лерой Сане, Даё Упаменкано, Нуссаир Мазрауи, Конрад Лаймер ва Альфонсо Дэвислар биттадан голни ўз ҳисобига ёздириб қўйди.

Иккинчи бўлимда эса Марсель Забицер бешта гол урди. Рафаэл Геррейру, Райан Гравенберх, Кингсли Коман ва Садио Мане ҳам майдонни голсиз тарк этмади.

Жамоасининг ғалабасидан сўнг Тухель ўз фикрларини билдириб ўтди: “Биз 27:0 ҳисобида ғалаба қозонган бўлсак-да, натижадан қониқмадим. Бундан-да кўпроқ гол уришимиз мумкин эди. Иккинчи бўлимни яхши ўтказмадик”.

“Роттах-Эгерн” бундай натижага олдиндан тайёр бўлган. Чунки ушбу клуб Германия чемпиони билан биринчи бор ўйнаётгани йўқ. Мюнхенликлар сўнгги йилларда уч марта “Роттах-Эгерн”га қарши баҳс олиб борди ва барчасида камида 20 та гол урди. 

2018 йилда “Роттах-Эгерн” 20 та гол ўтказиб юборган ва рақиб дарвозасига 2 та гол уришга муваффақ бўлганди. 2019 йилдаги учрашув мюнхенликларнинг 23:0 ҳисобидаги ғалабаси билан якунланган. 2023 йилда эса рекордмайстер рақиб дарвозасига жавобсиз 27 та гол урмоқда.

Жамолар ўртасидаги ўзаро учрашувларда умумий ҳисоб — 70:2 Мюнхен клуби фойдасига. 

Йирик ҳисобдаги мағлубиятларга қарамасдан, “Роттах-Эгерн” яна “Бавария” билан ўйинларга рози бўлаверади. Чунки бу камтаргина клубнинг топ-футболчиларга қарши кучини синаб кўришга имконият. Кичкина шаҳарча учун эса “Бавария”нинг келиши катта ҳодиса. 

Ушбу учрашувга чипталар ҳам демократик нархларда сотилган. Катталар учун — 10 евро, болалар учун эса 5 евро.