O‘zbekiston va Yevropa futbolida transferlar mavsumi davom etmoqda. “Daryo” transfer olamida ro‘y bergan eng so‘nggi voqealarni bir sahifaga yig‘di.
“Buxoro” klubi bir yo‘la olti nafar futbolchini o‘z safiga qo‘shib oldi. Frani Ikich (Xorvatiya), Luka Kukich (Bosniya va Gersegovina), Muhammadjon Rahimov (Tojikiston), Diyor Ortiqboyev, Asilbek Qayumov va Mahmud Jo‘raboyev endilikda faoliyatini buxoroliklar klubida davom ettiradi.
“Bavariya” Kim Min Je transferini e’lon qildi. “Napoli”ning janubiy koreyalik o‘yinchisi uchun nemis klubi 50 million yevro sarfladi. 2028-yilning yoziga qadar mo‘ljallangan bitim imzolagan Kim yangi jamoasida 3-raqam ostida harakat qiladi.
Myunxenliklar ustozi Tomas Tuxel o‘z jamoasida “Real” yarim himoyachisi Orelyen Tchuamenini ko‘rmoqchi. Fransiyalik futbolchi Madrid klubida yetarli o‘yin amaliyoti kafolatlanmaydigan bo‘lsa, Germaniyaga yo‘l olishga tayyor.
Tchuameni xizmatlariga “Liverpul”dan ham qiziqish bor. “Qizillar” Jordan Henderson va Fabinyoning o‘rniga o‘yinchi qidirmoqda. Ammo AS nashri xabariga ko‘ra, 23 yoshli futbolchi Madridni tark etish niyatida emas.
Saudiya Arabistoni klublari “Liverpul”ning yana bir futbolchisini qo‘lga kiritmoqchi. “Al-Hilol” mersisaydliklar vingeri Luis Dias uchun 50 million yevrolik taklif tayyorlamoqda, deya xabar berdi Record. Biroq “Liverpul” futbolchisi bilan xayrlashmoqchi emas.
“Al-Hilol” bu orada Malkom transferi borasida “Zenit” bilan kelishuvga erishdi. Ariyadhiah xabariga ko‘ra, bu hafta braziliyalik futbolchi tibbiy ko‘rikdan o‘tadi. Avvalroq piterliklar futbolchi uchun 50 million yevro so‘ragani xabar qilingandi.
“Al-Ahli” “Nyukasl” hujumchisi Allan Sen-Maksimen uchun “hakkalar”ga 25 million yevrolik taklif bilan chiqdi. Arablar futbolchining o‘ziga yiliga 12 million yevro maosh to‘lashga tayyor.
“Barselona” Harri Keynni 2024-yilning yozida tekinga qo‘lga kiritmoqchi. Angliyalik futbolchining “Tottenhem” bilan shartnomasi 2023/24-yilgi mavsum oxirida tugaydi. Bu yozda Keyn uchun “Bavariya” jiddiy kurash olib bormoqda, biroq “shporlar” Myunxen klubining bir nechta taklifiga rad javobini berdi.
“Atletiko” hujumkor yarim himoyachisi Joau Feliks “Barselona” o‘tish istagida ekanini yashirib o‘tirmadi. 23 yoshli futbolchining kelajagi noma’lum bo‘lib turibdi. Portugaliyalik iqtidor egasi o‘tgan mavsumning yarmini “Chelsi”da ijarada o‘tkazgandi.
“Inter Mayami” Xordi Alba transferini tez orada e’lon qiladi, deya xabar qilmoqda Mundo Deportivo. Devid Bekhemga tegishli klub avvalroq Lionel Messi va Serxio Busketsni o‘z safiga qo‘shib olgandi.
Mayamiliklar, shuningdek, yana bir “Barselona” sobiq vakili Luis Suaresga ham qiziqish bildiryapti. Biroq urugvaylik futbolchi “Gremio” bilan shartnomani bekor qilishi uchun 70 million yevro miqdoridagi tovon pulini to‘lashga to‘g‘ri keladi.
Izoh (0)