O‘zbekistonlik parayengil atletikachilar Jahon chempionatida 17 ta medalga ega chiqdi

Fransiyaning Parij shahrida 8—17-iyul kunlari parayengil atletika bo‘yicha Jahon chempionati bo‘lib o‘tdi.

Mazkur musobaqada O‘zbekiston terma jamoasi ham ishtirok etdi. O‘zbekistonlik parayengil atletikachilar 6 ta oltin, 7 ta kumush va 4 ta bronza medalini qo‘lga kiritdi.

Umumjamoa hisobida O‘zbekiston 8-pog‘onadan joy oldi. Birinchi o‘rinni Xitoy (16-16-13) egallagan bo‘lsa, Braziliya (14-13-20) va AQSH (10-14-15) kuchli uchlikdan joy oldi.

O‘zbekiston delegatsiyasi ushbu musobaqa orqali Parij—2024 Paralimpiya o‘yinlariga 19 ta yo‘llanmani qo‘lga kiritdi.

Qayd etish kerak, Doniyor Saliyev, Izzat Turg‘unov va Asila Mirzayorova uzunlikka sakrash bahslarida, yadro uloqtirishda Bobur Omonov, nayza uloqtirishda esa Nurxon Qurbonova jahon rekordini yangiladi.

Parijdagi Jahon chempionatida 103 mamlakatdan 1206 nafar paraatlet ishtirok etdi. O‘zbekiston terma jamoasi 24 nafar sportchi bilan qatnashdi.