O‘zbekistonda yangi o‘quv yilidan boshlab ishga joylashayotgan xorijiy til o‘qituvchilaridan B2 darajadagi sertifikat talab etiladi.
Vazirlar Mahkamasining 2021-yil 19-maydagi 312-son qarori bilan 2022/2023-o‘quv yilidan boshlab davlat taʼlim muassasalarining xorijiy tillar o‘qituvchisi lavozimiga ishga qabul qilinayotgan nomzodlar kamida B2 darajadagi milliy yoki unga tenglashtirilgan mos darajadagi xalqaro sertifikatga ega bo‘lishi belgilangan edi.
Biroq mazkur tartib hukumat tomonidan o‘tgan yili maktablarda xorijiy tillarni o‘qitish jarayoni davomiyligini taʼminlash maqsadida kechiktirilgan va 2023/2024-o‘quv yilidan kuchga kirishi belgilangan.
Shu bois 2023/2024-o‘quv yilidan boshlab yangi ishga kirayotgan xorijiy tillar o‘qituvchilaridan B2 darajadagi sertifikat talab qilinadi.
Eslatib o‘tamiz, 2024/2025-o‘quv yilidan maktabdagi har qanday chet tili fani o‘qituvchisi B2 darajadagi sertifikatga ega bo‘lishi talab etiladi. O‘z navbatida, C1 darajadagi xalqaro sertifikatga ega o‘qituvchilar ham ayni vaqtda oylik ish haqlarini 50 foizga oshirish imkoniyatiga ega.
Izoh (0)