Ba’zan ijtimoiy tarmoqlarda faqat qiz farzand ko‘rgani uchun ayolidan ranjigan erkaklar haqidagi postlarga ko‘zimiz tushib qoladi. Ammo farzandning jinsi ko‘p jihatdan ayolga bog‘liq emasligi allaqachon tibbiyot tomonidan isbotlangan.
O‘zbek shou-biznesi vakillari orasida ham faqat qiz farzandni tarbiyalayotgan mashhurlar bisyor. Ular nolishmaydi, aksincha qizlaridan faxrlanishadi.
Muqaddas Xoliqova
O‘zbekiston xalq artisti Muqaddas Xoliqovaning uch nafar qiz farzandi bor. To‘ng‘ich qizi Ominaxon bankda kadrlar bo‘limi boshlig‘i lavozimida ishlaydi. Zebiniso qizi esa aktrisa, O‘zbek milliy akademik drama teatrida faoliyat yuritadi. Kenja farzandi esa uy bekasi.
Elmurod Haqnazarov
“Dizayn” jamoasi a’zosi Elmurod Haqnazarov ham uch nafar qizni voyaga yetkazyapti. U “Daryo”ga bergan intervyusida aynan uch nafar qizi bo‘lishini orzu qilgani haqida aytib o‘tgan.
— Otabek Muhammadzohidning ham uch nafar qiz farzandi va bitta o‘g‘li bor. Uylanmasdan avval “Mening ham uchta qizim bo‘lsa, yaxshi tarbiya berib, egasiga topshirsam” deb niyat qilardim. Alloh o‘g‘il bersa quvonaman, ammo qizlarimning boriga ham shukr qilaman. Chunki dunyoda farzandsiz insonlar ham juda ko‘p, — deydi Elmurod Haqnazarov.
Yulduz Hamidova
Ayni kunlarda AQSHda istiqomat qilayotgan Yulduz Hamidova ham uch nafar qiz farzandni tarbiyalagan. Uning to‘ng‘ich qizi Toshkentda, Fotima va Zuhra ismli egizaklari esa AQSHda yashaydi. Aktrisa ham aynan egizaklari sabab xorijga ko‘chib o‘tgan. Ona va bolalar bir paytda universitetga qabul qilinib, tahsil olishmoqda.
Gulchehra Jamilova
O‘zbekiston xalq artisti Gulchehra Jamilovaning ikki nafar qiz farzandi bor.
— O‘g‘lim yo‘q, deb o‘ksinmayman. Chunki Allohim o‘g‘ilning o‘rnini to‘ldiradigan nabiralar ato etgan. Qizlarim juda mehribon. Katta qizim Asal xorijda yashaydi, kenjam esa biz bilan birga, — deydi aktrisa.
Vazira Yunusova
Aktrisa Vazira Yunusova ham uch nafar qiz farzandning onasi. “Daryo”ga bergan intervyusida ba’zi hollarda o‘g‘li yo‘qligi sabab o‘ksinishi haqida aytib o‘tgan.
— O‘g‘lim yo‘q, o‘lsam tobutimni kim ko‘taradi, deb ko‘p o‘ylayman. Uchinchi qizimni ancha yil o‘tib dunyoga keltirgandim. Nolishga haqqim yo‘q, qizlarim juda mehribon, — deydi aktrisa Vazira Yunusova.
Shohida Ismoilova
Shohida va Mahmud Ismoilovlarning ham uch nafar qiz farzandi bor. Aktrisa intervyularining birida kuyovlar ham o‘g‘il bo‘la olishi haqida aytib o‘tgandi.
— Turmush o‘rtog‘imning salomatligi yomonlashib qolganida kuyovlar ham o‘g‘ildek bo‘lolishini bildim. Uch nafar kuyovim ham yonimizda turib, navbati bilan dadamizga qarashdi. O‘g‘lim yo‘q, deb o‘ksinishga hojat yo‘q, mehribon kuyovlarim bor, —deydi aktrisa Shohida Ismoilova.
Zuhra Ashurova
Aktrisa Zuhra Ashurova ham ikki farzandni voyaga yetkazgan. To‘ng‘ich qizi Maftuna Ashurova boshlovchi va aktrisa sifatida faoliyat ko‘rsatadi. Kenja farzandi Muslima Ashurova esa otasi Qahramon Ashurov kabi televideniye rejissori bo‘lishni ma’qul ko‘rgan. Ammo u hozircha ish faoliyatini boshlagani yo‘q.
Izoh (0)