Omad necha yoshda kulib boqishini oldindan bilish qiyin. San’at vakillari orasida ham bir necha yil davomida rollari omadli chiqishini kutib yashagan va 40 yoshdan keyin mashhurlik cho‘qqisini zabt etgan ijodkorlar bisyor.
Ubaydullo Omonning kinodan ketishiga nima sabab bo‘lgan?
O‘zbekiston xalq artisti Ubaydullo Omon kinodagi ilk rolini 21 yoshida ijro etgan. Ya’ni u 1969-yili rejissor Anatoliy Qobulovning “Bahor yomg‘irlari” filmida bosh qahramon Samig‘ rolini yaratgan. 1972-yili oilaviy sharoiti sabab, Buxoroga qaytib ketishiga to‘g‘ri keladi.
— “Yosh gvardiya” teatrida rejissor bo‘lib ishlayotganimda Toshkentdan ikki xonali uy sovg‘a qilishgandi. Ikki qizim dunyoga kelib, yaxshi ishlab yurgan paytimizda Buxorodan noxush xabar keldi. Qaynotam olamdan o‘tib qolganini aytishdi. Dafn marosimlari o‘tganidan keyin otam rahmatli “Kelinning yettita yosh ukasi qoldi, ularning biri nogiron. Sen qaytib qaynonangga qarashmasang bo‘lmaydi”, degan. Shu gapdan keyin Toshkentdagi karyerani yakunlab, Buxoroga ko‘chib o‘tganmiz, — deydi aktyor Ubaydullo Omon.
U aktyorlikdan tashqari, bir necha yil teatrda rejissorlik ham qilgan. Kinodagi 17 yillik tanaffusdan so‘ng rus kino ijodkorlari tomonidan suratga olingan “Vatanga qaytish” filmidagi roli bilan faoliyatini qayta tiklagan. 2004-yili suratga olingan “Marjona” va “Sarvinoz” kabi filmlardagi rollari uni o‘zbek tomoshabinlariga yaqindan tanishtirgan. 2008-yili suratga olingan “Faryod” filmidagi soqov ota roli aktyorni qaytadan kashf etdi desak mubolag‘a bo‘lmaydi. U paytda aktyor 46 yoshni qarshilagan edi.
Aziza Begmatova salkam 40 yil kutilgan rol...
O‘zbekiston xalq artisti Aziza Begmatova kinodagi faoliyatini 1989-yilda boshlagan. Ammo ancha yilga qadar uni asosiy rollarga taklif etishmagan. Shu boisdanmi unga 43 yoshiga qadar mashhurlik baxti nasib etmaydi.
— Bahodir Yo‘ldoshevga 40 yilda onam bilan uchrashganim, uning gapirishi, fe’l-atvori haqida gapirib berganman. U bir nechta savollarni bergan. Keyin bilsam u gaplarimni eshitib, xayolan Checha obrazini yaratgan ekan. Bu rol menga nasib etdi, bir necha yil davomida dublyorsiz uni ijro etdim. Haqiqatan ham spektakl kutilganidan ham ko‘proq mashhurlikka erishdi va meni butun O‘zbekistonga checha sifatida tanitdi, —deydi aktrisa Aziza Begmatova.
Aktrisa bu yil 80 yoshni qarshilaydi. “Checha” spektaklidan so‘ng uning klip va filmlarga ham xuddi ana shu obrazi uchun taklif etishgan. Tomoshabinlar ham uni ismi emas, balki obrazi bilan yaxshiroq tanishadi.
Yodgor Sa’diyev: “Ilk mukofotni 43 yoshimda olganman”
O‘zbekiston xalq artisti Yodgor Sa’diyev ham 50 yoshdan keyin mashhurlikka erishgan ijodkorlardan biri hisoblanadi. U kinodagi faoliyatini 1967-yilda “Dilbarim” filmidagi roli bilan boshlagan bo‘lishiga qaramay, uni mashhur qilgan rol Asadbek hisoblanadi.
— Hozirgi yoshlar birdan mashhur bo‘lib ketgisi keladi. Shaxsan men 43 yoshimda ilk davlat mukofotini qo‘lga kiritganman. O‘shanda rahmatli O‘zbekiston Respublikasining birinchi Prezidenti Islom Karimovga birinchi mukofotim ekanligini aytganimda qulog‘imga “Men ham birinchi marta topshiryapman”, degandi, — deydi aktyor Yodgor Sa’diyev.
Aktyor 1990-yildan to 1998-yilga qadar birorta filmda suratga tushmagan. Bor e’tiborini teatrdagi faoliyatiga qaratib, qator rollarni ijro etgan. “Shaytanat” serialidagi Asadbek esa uning aktyor sifatida mashhurlikka erishishiga sabab bo‘lgan.
Zulayho Boyhonovaga aktrisalikda omad kulmadi
O‘zbekiston xalq artisti Zulayho Boyhonova xonandalikdan avval teatr aktrisasi bo‘lgan. Filmlarda ham katta-kichik rollarni ijro etgan. Ammo ijodkor qo‘shiqchi sifatida ancha kech tanildi. Ustozi Abduhoshim Ismoilov bilan hamkorlikda yaratgan “Hay-hay” qo‘shig‘i uni xalqqa yaqinlashtirdi.
Zulayho Boyhonova san’atdagi faoliyatini 1986-yili boshlagan. Ammo unga mashhurlik baxti 2008-yilda nasib etdi. “Hay-hay” qo‘shig‘i yaratilganida ijodkor 44 yoshda edi.
“‘Sevginator’ orqali 66 yoshda tanildim”
O‘zbekiston xalq artisti Shafoat Rahmatullayeva ijoddagi faoliyatini 1965-yilda boshlagan. Shu kungacha Jizzax, Sirdaryo va Qo‘qon teatrlarida faoliyat yuritgan. U kinodagi ilk rolini “Masxaraboz” filmida ijro etgan.
Ammo aktrisaning xalq orasida tanilishiga “Sevginator” filmi sabab bo‘lgan. Rejissor Abduvohid G‘aniyevning “Sevginator” filmi suratga olinganida aktrisa 66 yoshda edi. Ijarachi ayol roli aktrisaga kutilmagan mashhurlik olib keldi.
Izoh (0)