“Qizimga uy ishlarini qilgani uchun oylik to‘layman”. Rayhon Ulasenova farzand tarbiyasi borasidagi tavsiyalari bilan o‘rtoqlashdi

Aktrisa va boshlovchi Rayhon Ulasenova “Qizil pomada” ko‘rsatuviga bergan intervyusida qiziga har oy uy ishlarini qilayotgani uchun oylik to‘lashini va shu orqali unga moddiy tomonlama tarbiya berayotgani haqida gapirib berdi.

“Oxirgi uch-to‘rt yil ichida qizim biror marta pul so‘ramagan”

— Men har oy qizimga pul to‘layman. Nima sababdan bu ishni qilayotganimni so‘rashingiz mumkin, aslida men bitta o‘q bilan ikkita quyonni uraman. Oxirgi uch-to‘rt yil ichida qizim biror marta pul so‘ramagan. Yaqinda o‘zining puliga iPhone 14 sotib oldi. Men uni go‘yoki qilayotgan ishlari uchun rag‘batlantiryapman-u, lekin qaysidir ma’noda o‘zi pul ishlab topyapti. Qizim o‘z pulini avaylaydi, ortiqcha ishlatib qo‘ymaydi va o‘zi olgan narsasi juda ham qadrli bo‘ladi. Masalan, Dubayda quloqchinini yo‘qotib qo‘ydi, uni uch yil oldin o‘zining puliga sotib olgan edi. Keyin men uni topishim kerak, shuncha pulga sotib olganman, dedi. Oxiri topdik.

“Hozirdan o‘zi pul yig‘ib, taqsimlashni, nimaga ishlatishni o‘rganadi”

— Yoshligimizda kichkina teatr studiyamiz bo‘lardi, otam ishga borib kelganimizdan so‘ng hammaga oylik to‘lardi. Bu pullarni oilaniki deb olib qo‘ymasdi, hammaga oylik to‘lardi. Kontraktimizni ham o‘zimiz to‘laganmiz, kiyim-kechagimizni ham o‘zimiz olganmiz. Kimdir u bolangiz-ku, deb aytishi mumkin, aslida hech kim hech kimga hech narsa qilishga majbur emas. Qaysidir ma’noda, u mening yordamchim, ishlarni qilyapti. Kamroq beryapman, lekin u o‘zining puli. Hozirdan o‘zi pul yig‘ib, taqsimlashni, nimaga ishlatishni o‘rganadi. Nimadir olishi kerakligini aytadi, puling yetsa, ol, deyman.