Ўзбекистон Экологик партияси Хоразм вилоятининг Шовот туманидаги Комилжон Отаниёзов номли дам олиш ва истироҳат боғида манзарали дарахтлар кесилганини маълум қилди.
Ижтимоий тармоқларда Шовот шаҳарчасидаги К.Отаниёзов номли дам олиш ва истироҳат боғида қуримаган дарахтларни кесиб ташлашмоқда” деган мазмунда видеохабар тарқалди. Ушбу ҳолат бўйича Ўзбекистон Экологик партияси Хоразм вилояти ва туман партия ташкилоти ходимлари, туман Экология, атроф муҳитни муҳофаза қилиш ва иқлим ўзгариши бўлими вакиллари, боғ масъуллари иштирокида ўрганиш ишлари олиб борилган.
Аниқланишича, ҳақиқатдан ҳам номаълум шахслар томонидан 9 июль куни тунги пайтда боғда ўзларини тадбиркор, деб атаган шахслар томонидан бир нечта дарахтлар кесилган. Маҳалла фуқаролари томонидан жамоатчилик асосида ўтказган назорат давомида мазкур шахслар ҳаракати тўхтатилиб, сўралганда туман ҳокими томонидан оғзаки рухсат берилгани айтилган.
Маълум бўлишича, ҳеч бир тадбиркорга боғ ҳудудидан ер ажратилмаган.
Ўзбекистон Экологик партияси бундай салбий ҳолатларни кескин қоралаган ҳолда ноқонуний дарахт кесганларга нисбатан қатъий чора кўрилишини сўрайди.
Мазкур истироҳат боғидаги қурилиш ишлари халқ депутатлари Шовот туман кенгашининг 2023 йил 21 февралдаги қарори билан бошланган. Қарор иловасининг 10-бандида Комилжон Отаниёзов номли истироҳат боғида йил давомида 14 та аттракцион ўрнатиш ҳамда 10 та кўчма савдо шохобчаларини жойлаштириш учун ер майдонини аукционга чиқариш белгиланган.
Хоразм вилояти Экология бошқармаси ҳолат юзасидан дастлабки ўрганиш бошланганини, ўрганиш натижаси юзасидан қўшимча маълумот берилишини билдирди.
Ноқонуний дарахт кесиш ҳолатлари
Бир неча кун олдин Фарғонадаги чегара пости яқинида 12 туп манзарали дарахт қўпориб ташлангани тўғрисида хабар берилганди. Ўзбекистонда 2022 йил давомида дарахт ва буталарнинг ноқонуний кесилиши ортидан табиатга 10 миллиард сўм зарар етказилган. Ўтган йилда жами 1 777 туп қимматбаҳо ва кўп йиллик дарахтлар кесилган. Вазият таҳлил этилганда, қурилиш объектлари атрофини ўраб олиш натижасида дарахтларнинг қаровсиз қолиши, шикастланиши ва нобуд бўлиш ҳолатлари содир этилаётгани аниқланган.
Изоҳ (0)