“Bolada qutirish alomatlari yo‘q. Hushiga kelgan, mustaqil ovqatlanmoqda”. Andijonda itlar galasi g‘ajigan 5 yoshli bola haqida maʼlumot berildi

Tarmoqlarda Andijonda daydi itlar to‘dasi yosh bolani g‘ajigani haqida xabarlar tarqaldi. Holat yuzasidan viloyat sog‘liqni saqlash boshqarmasi “Daryo”ga maʼlumot berdi.

Maʼlum qilinishicha, 2023-yilning 9-iyul kuni viloyatning Xo‘jaobod tumanidagi “Mustaqillikning 30 yilligi” mahallasida bir necha itlar galasi xolasinikiga mehmonga kelgan Paxtaobod tumanining “Qorashoh” mahallasida yashovchi, 2018-yilda tug‘ilgan B.Ya.ni tishlab olgan. Natijada bola tan jarohati olgan.

Bola o‘sha kunning o‘zidayoq Respublika shoshilinch tez tibbiy yordam ilmiy markazining viloyat filialiga olib kelingan. Bolaning o‘ng yuzi, ikkala quloq suprasi, chap o‘mrov sohasi, ko‘krak qafasi orqa yuzasi, ikkala yelka, dumg‘aza sohasida it tishlagan jarohatlari mavjud. Unda qutirish alomatlari yo‘q. Davolanish jarayonlari viloyat sog‘liqni saqlash boshqarmasi boshlig‘i va filial direktori tomonidan nazoratga olingan. Ayni paytda bemorning umumiy ahvoli nisbatan qoniqarli, hushida, o‘zi mustaqil ovqatlanmoqda, harakatlanmoqda”, — deyiladi xabarda.

“Daryo” muxbiri voqea tafsilotlarini o‘rganmoqda.