AQSH Serbiya razvedka xizmati rahbariga qarshi sanksiyalar kiritdi

AQSH moliya vazirligi Serbiya razvedka xizmati, Xavfsizlik va axborot agentligi rahbari Aleksandr Vulinga nisbatan sanksiyalar joriy qildi. Bu haqda 11-iyul kuni vazirlik saytida xabar berildi.

“Aleksandr Vulin transmilliy uyushgan jinoyatchilik, noqonuniy giyohvand moddalar savdosi va mansab vakolatini suiisteʼmol qilish bilan shug‘ullangan”, — deyiladi AQSH Moliya vazirligi matbuot-relizida.

Vazirlik maʼlumotlariga ko‘ra, amaldor serbiyalik qurol-yarog‘ sotuvchisi Slobodan Teshich bilan “o‘zaro manfaatli munosabatlarni saqlab turibdi”, unga Serbiya chegaralari bo‘ylab “noqonuniy qurol-yarog‘ jo‘natmalarining to‘siqsiz aylanishini taʼminlashda” yordam bermoqda.

“Moliya vazirligi G‘arbiy Bolqonda samarali va demokratik boshqaruvga putur yetkazgan va shaxsiy manfaati yo‘lida o‘z mansabini suiiste’mol qilganlarni jinoiy javobgarlikka tortishdan ikkilanmaydi. Bugungi harakat Aleksandr Vulinni uning korrupsion va beqaror harakatlari uchun javobgar, deb hisoblashimizni anglatadi, uning harakatlari Rossiyaning mintaqadagi g‘arazli harakatlariga ham hissa qo‘shgan”, — dedi AQSH Moliya vazirligi kotibining terrorizm va moliyaviy razvedka bo‘yicha o‘rinbosari Brayan Nelson.

Ma’lumot uchun, sanksiyalar ro‘yxatiga tushgan odamning AQSHdagi aktivlari muzlatiladi, unga Amerika fuqarolari va kompaniyalari bilan biznes yuritish taqiqlanadi.

Vulin Serbiya Mudofaa vazirligi va Ichki ishlar vazirligini boshqargan

Vulin Serbiya razvedka xizmatini boshqarishdan oldin 2017-yildan 2020-yilgacha mamlakat mudofaa vaziri, 2020-yildan 2022-yilgacha esa Serbiya ichki ishlar vaziri bo‘lgan. U kremlparast qarashlarga amal qiladi, Rossiyaning Ukrainaga bosqini boshlanganidan keyin u Serbiya “Rossiyaga qarshi isteriyaga” qo‘shilmasligini vaʼda qilgan.

Rossiyalik siyosatchi va jurnalist Vladimir Kara-Murzaning aytishicha, 2021-yilda Vulin Moskvaga kelgan va u yerda Rossiya Xavfsizlik kengashi kotibi Nikolay Patrushev bilan uchrashgan, shundan so‘ng tomonlar rangli inqiloblarga qarshi kurash bo‘yicha qo‘shma ishchi guruh tuzilganini e’lon qilgan.