Вилнюсдаги саммитда НАТО Хитойнинг сиёсати ва амбициялари альянс қадриятларига қарши бўлаётганини маълум қилди. Бунга жавобан Хитой Осиё минтақасида ўз манфаатларини ҳимоя қилишини билдирди, дейилади Хитойнинг Европа Иттифоқидаги дипломатик ваколатхонаси баёнотида.
“Биз НАТОга шуни очиқ айтамиз, Хитой ўз суверенитети, хавфсизлиги ва тараққиёт манфаатларини қатъий ҳимоя қилади. НАТОнинг Осиё-Тинч океани минтақасида шарққа томон кенгайишига қатъий қаршимиз. Хитойнинг қонуний ҳуқуқ ва манфаатларига зиён етказадиган ҳар қандай ҳаракатлар қатъий рад этилади”, — дейилади дипломатик миссия хабарида.
Шунингдек, баёнотда “халқаро хавфсизлик билан боғлиқ вазиятнинг ёмонлашуви шароитида” альянснинг ҳаракатларидан хавотир билдирилган. Хитой томонининг фикрича, НАТО “ўз зиммасидаги масъулиятни ўйламаяпти”, атом энергетикаси соҳасидаги баёнотлар билан қарама-қаршилик ва кескинликни кучайтирмоқда.
НАТО 11 июль куни Вилнюс саммити чоғида эълон қилинган коммюникеда Хитойнинг “амбициялари ва мажбурлаш сиёсати альянс манфаатлари, хавфсизлиги ва қадриятларига қарши чиқаётгани” таъкидланган.
Улар, шунингдек, Россия ва Хитой ҳамкорлигини танқид қилиб, Пекинни Россиянинг Украинадаги уришини қоралашга чақирган. Альянс Хитой билан ҳамкорликка очиқ эканини, бироқ, аввало, ўз манфаатларини ҳимоя қилишини қайд этган.
Коммюникеда асосий эътибор Россияга қаратилган. Мамлакат Украинадаги жанговар ҳаракатларни тўхтатишга чақирилди ва НАТО чегаралари яқинида Москвадан ядровий таҳдидлар кучайиб бораётгани таъкидланди.
“НАТО қарама-қаршиликка интилмайди ва Россияга таҳдид солмайди. Унинг душманона сиёсати ва ҳаракатларидан келиб чиқиб, биз Россияни ўз ҳамкоримиз деб ҳисоблай олмаймиз”, — деб хулоса қилди альянс, аммо улар Москва билан алоқа каналларини сақлаб қолишга тайёр эканини қўшимча қилди.
Россиянинг АҚШдаги элчиси Анатолий Антоновнинг айтишича, НАТО саммити альянснинг Россия чегаралари яқинида қўшинларни жамлашга эътибор қаратаётганини кўрсатади ва унинг Россияга қарши йўналишда эканини тасдиқлайди.
Изоҳ (0)