O‘zbekistonning ko‘plab shaharlarida 40 darajadan yuqori harorat kuzatilmoqda

Bugun, 12-iyul soat 15:00 holatiga ko‘ra, respublikanig bir qator shaharlarida havo harorati 40 darajadan oshdi. 

“O‘zgidromet” platformasida taqdim etilayotgan axborotda bir qator shaharlarda harorat 40 darajadan yuqori ekani ko‘rinadi. Xususan, Urganch, Navoiy, Buxoro, Termiz va Qarshi shaharlarida havo harorati 41–43 daraja orqalig‘ida issiq bo‘lmoqda. Toshkent shahri va Gulistonda 40,1 darajali jazirama kuzatilyapti.

Nukus, Samarqand, Nurafshon, Namangan, Andijon va Farg‘ona shaharlaridagi havo harorati 37,5 darajadan 39,9 darajagacha issiq bo‘lmoqda.

Eslatib o‘tamiz, “O‘zgidromet” 12-iyulda qanday ob-havo bo‘lishini maʼlum qilgandi. Prognozda respublika bo‘ylab havo harorati 37–45 daraja issiq bo‘lishi qayd etilgan. Ma’lum qilinishicha, 13-iyulda havo harorati 45 darajagacha ko‘tariladi. 14–16-iyul kunlari esa harorat 35–42 daraja oralig‘ida bo‘ladi.

Avvalroq jaziramadan saqlanish bo‘yicha tavsiyalar e’lon qilingandi. Jumladan, uzoq vaqt issiqda qolmaslikka harakat qilish, tana va boshni to‘g‘ridan to‘g‘ri quyosh nurlaridan himoyalashga urinish lozim.

Ko‘p suyuqlik ichish, muzlatgichdan muzdek ichimliklar emas, iliq suv yoki eng yaxshisi ko‘k choy ichish tavsiya etiladi. Ko‘proq meva, sabzavotlarni iste’mol qilish, juda achchiq va yog‘li ovqatlarni iste’mol qilmaslikka harakat qilish zarur. Sovitish moslamalari bilan jihozlanmagan do‘konlardan mahsulotlarni xarid qilmagan maq’ul, Ular quyoshda qancha vaqt bo‘lganini bilmaysiz.

“Konditsionerli xonada bo‘lganingizda, to‘g‘ridan to‘g‘ri sovuq havo oqimi tagida o‘tirmang va konditsionerni 18 darajadan past bo‘lmagan haroratga dasturlang. Yurak-qon tomir kasalliklari bor insonlar dori-darmonlarni qabul qilish bo‘yicha shifokor bilan maslahatlashishlari kerak” — deya ma’lum qilgan “O‘zgidromet”.

Sog‘liqni saqlash vazirligi e’lon qilgan tavsiyalarga ko‘ra, issiq havoda tabiiy, yorqin rangdagi, paxta matosidan bo‘lgan kiyimlarni kiyish maqsadga muvofiq. Mavsumga mos bunday liboslar terining nafas olishiga imkon yaratadi, tana qizib ketishining oldini oladi. Qolaversa, jazirama kunlarda qahvadan voz kechgan ma’qul. Chunki u issiq kunda charchoqni oshiradi.