Surxondaryo viloyatining Bandixon tumanida faoliyat yurituvchi fermer tuman prokuroridan kaltak yeganini aytmoqda. Bu haqda Telegram’dagi “Mushtum” jurnali kanalida xabar berilgan.
O‘zini Chori Pirimqulov deb tanishtirgan fermerning aytishicha, voqea 2023-yilning 7-iyul kuni sodir bo‘lgan.
“Men tuman prokurori Saotmurod Mahmanovdan noroziman, bu kishining olib borayotgan siyosati, xalqqa hurmatsizligi ortiqcha bo‘lyapti”, — deydi fermer tuman prokuroridan noroziligini aytar ekan.
Fermer xo‘jaligi rahbarining aytishicha, tuman prokurori ikkinchi sektor hududidagi fermerlarga 2 juft etik va bir dona fonar olib kelishi kerakligini tayinlagan.
Tuman prokurori aytgan yig‘ilish “Shoh barakat” fermer xo‘jaligiga qarashli dala shiyponida bo‘lishi kerak edi. Shu sabab shiyponga sakkizdan o‘n daqiqa o‘tganda bordim. Yig‘ilish sakkizda boshlanishi aytilgandi. Lekin men etik topishga qiynalganim bois kechikdim. Shunda prokuror nega kechikding, deb so‘raganida saratonda rezina etik topish qiyin bo‘lganini aytib, uzr so‘radim. Etikni olib kel, dedi. Olib borsam, meni “cho‘chqa, cho‘chqadan tarqalgan” deya haqoratlab, “bu kiyilgan, eski etik ekan”, deb o‘sha etik bilan boshimga urdi. Yelkamga bir necha marotaba qo‘li bilan ham urdi. Shuningdek, “itdan tarqalgan, chiqqan joyingga tiqib yuboraman”, deya haqoratladi, — deydi fermer.
Fermer tuman prokurorining kaltagi va haqorati sabab shaʼni toptalganini, barcha tanishlarining kulgisiga qolayotganini aytib, “ishlashdan ko‘nglim qolib, eʼtiborim susayib qoldi. Ayolim, farzandlarim ham undan nafratlanib, o‘zlari hozir chora ko‘rish darajasiga yetib turibdi”, — dedi.
Fermer, shuningdek, prokurorning bu qilmishiga javoban unga yetarli darajada javob berishga qodirligini, ammo prokuror formasi sabab bunga botinolmaganini aytib, “formaga xiyonat qilishni o‘zimga ep ko‘rmadim”, — demoqda.
Bandixon tumani prokurori Soatmurod Mahmanov tumandagi mahalla raislarini haqorat qilib, jamoatchilikka tanilgandi.
Mazkur audioda prokuror tumandagi MFY raislariga “Erkakmisan sen ham? Xotinchalish, itdan tarqalgan ekansan-da, bo‘lmasa odamning ishini qilarding-da. Bor, borib itga o‘xshab vovulla ko‘chada”, deganini, “O‘lsang, bugun ko‘mar edik”, “Itdan tarqaganmisan, odamdan tarqaganmisan?” deya haqorat qilganini eshitish mumkin.
Bosh prokuratura axborot xizmati rahbari Hayot Shamsutdinov prokurorning harakati o‘rganilayotganini, tez orada o‘rganish natijalari haqida maʼlum qilishini bildirgandi. Biroq o‘rganish natijalari nima bilan yakunlangani haligacha jamoatchilikka nomaʼlumligicha qolmoqda.
Izoh (0)