Qashqadaryo viloyatining G‘uzor tumani hokimi Bekzod Suyunov xorijda mehnat qilayotgan o‘zbek migrantlari bilan muloqot qilib, ularni qiynayotgan muammolar bilan qiziqdi. Bu haqda “Daryo”ga tuman hokimligi axborot xizmati rahbari Xudoyberdi Yo‘ldoshev xabar berdi.
Taʼkidlanishicha, tuman hokimi “Eʼtibordasiz” loyihasini yo‘lga qo‘yib, xorijda mehnat qilayotgan 70 nafardan ortiq g‘uzorlik yoshlar bilan onlayn muloqot qilgan.
“Videokonferensiya orqali bo‘lib o‘tgan uchrashuvda 70 nafardan ortiq g‘uzorlik mehnat migrantlari ishtirok etib, mahallasini obod qilish, farzandini davolatish va yaqinlariga ko‘mak berish kabi masalalarda o‘zlarining taklif va murojaatlarini bildirishdi. Uchrashuvda 30 dan ortiq migrant murojaati tuman hokimi tomonidan alohida nazoratga olinib, hokim o‘rinbosarlari va tegishli mutasaddilarga vazifalar yuklatildi”, — deydi Xudoyberdi Yo‘ldoshev.
Bekzod Suyunovning matbuot kotibiga ko‘ra, onlayn muloqotdan so‘ng tuman hokimi Farrux Hasanovning qulog‘ida muammosi bo‘lgan 7 yoshli farzandi Faxriddinning ahvolidan xabar olgan.
“7 yoshli bolaning qulog‘i yaxshi eshitmagani sabab, eshitish apparati qo‘yish kerak ekan. Ammo muammo shundaki, yosh bola tengdoshlari bilan o‘ynab, tortishsa, ehtiyotsizligi sabab uzilib tushsa yoki buzilib qolsa qulog‘iga zarar yetkazar ekan. Bu esa keyinchalik ham unga eshitish apparati qo‘yib bo‘lmasligiga sabab bo‘lar ekan. Shu sabab hozircha Farrux Hasanovning turmush o‘rtog‘i bolasiga yaxshi logoped kerakligini, logopedning kunlik xizmat haqqi 60 ming so‘m bo‘lishini, ammo mablag‘ masalasida muammo borligini aytdi. Biz Farrux Hasanovning muammosiga yechim topish uchun ularga logopedning uch oylik to‘lovini, 6 million so‘m mablag‘ni to‘lab berdik”, — deydi Bekzod Suyunov.
Xudoyberdi Yo‘ldoshevning qo‘shimcha qilishicha, tuman hokimi shuningdek, o‘zbek migranti Feruz Hakimov so‘ragan muammo — opasining o‘qishi uchun 7 million so‘m kontrakt pulini to‘lab bergan. Jamshid Qorjovov talab qilgan “Mevazor” mahallasidagi qishloq yo‘llarini taʼmirlash va tosh shag‘al yotqizish ishlarini boshlab yuborgan.
“Bundan tashqari tuman hokimi yoshlarni 9-iyul kuni bo‘lib o‘tadigan O‘zbekiston Respublikasi Prezidenti saylovida faol ishtirok etishga chaqirdi. Shuningdek, bu kabi onlayn muloqotlar tez-tez tashkil etib borilishini va xorijda ishlab yurgan g‘uzorliklar alohida eʼtiborda ekanligini taʼkidladi”, — deydi Xudoyberdi Yo‘ldoshev.
Izoh (0)