Қашқадарё вилоятининг Ғузор тумани ҳокими Бекзод Суюнов хорижда меҳнат қилаётган ўзбек мигрантлари билан мулоқот қилиб, уларни қийнаётган муаммолар билан қизиқди. Бу ҳақда “Дарё”га туман ҳокимлиги ахборот хизмати раҳбари Худойберди Йўлдошев хабар берди.
Таъкидланишича, туман ҳокими “Эътибордасиз” лойиҳасини йўлга қўйиб, хорижда меҳнат қилаётган 70 нафардан ортиқ ғузорлик ёшлар билан онлайн мулоқот қилган.
“Видеоконференция орқали бўлиб ўтган учрашувда 70 нафардан ортиқ ғузорлик меҳнат мигрантлари иштирок этиб, маҳалласини обод қилиш, фарзандини даволатиш ва яқинларига кўмак бериш каби масалаларда ўзларининг таклиф ва мурожаатларини билдиришди. Учрашувда 30 дан ортиқ мигрант мурожаати туман ҳокими томонидан алоҳида назоратга олиниб, ҳоким ўринбосарлари ва тегишли мутасаддиларга вазифалар юклатилди”, — дейди Худойберди Йўлдошев.
Бекзод Суюновнинг матбуот котибига кўра, онлайн мулоқотдан сўнг туман ҳокими Фаррух Ҳасановнинг қулоғида муаммоси бўлган 7 ёшли фарзанди Фахриддиннинг аҳволидан хабар олган.
“7 ёшли боланинг қулоғи яхши эшитмагани сабаб, эшитиш аппарати қўйиш керак экан. Аммо муаммо шундаки, ёш бола тенгдошлари билан ўйнаб, тортишса, эҳтиётсизлиги сабаб узилиб тушса ёки бузилиб қолса қулоғига зарар етказар экан. Бу эса кейинчалик ҳам унга эшитиш аппарати қўйиб бўлмаслигига сабаб бўлар экан. Шу сабаб ҳозирча Фаррух Ҳасановнинг турмуш ўртоғи боласига яхши логопед кераклигини, логопеднинг кунлик хизмат ҳаққи 60 минг сўм бўлишини, аммо маблағ масаласида муаммо борлигини айтди. Биз Фаррух Ҳасановнинг муаммосига ечим топиш учун уларга логопеднинг уч ойлик тўловини, 6 миллион сўм маблағни тўлаб бердик”, — дейди Бекзод Суюнов.
Худойберди Йўлдошевнинг қўшимча қилишича, туман ҳокими шунингдек, ўзбек мигранти Феруз Ҳакимов сўраган муаммо — опасининг ўқиши учун 7 миллион сўм контракт пулини тўлаб берган. Жамшид Қоржовов талаб қилган “Мевазор” маҳалласидаги қишлоқ йўлларини таъмирлаш ва тош шағал ётқизиш ишларини бошлаб юборган.
“Бундан ташқари туман ҳокими ёшларни 9 июль куни бўлиб ўтадиган Ўзбекистон Республикаси Президенти сайловида фаол иштирок этишга чақирди. Шунингдек, бу каби онлайн мулоқотлар тез-тез ташкил этиб борилишини ва хорижда ишлаб юрган ғузорликлар алоҳида эътиборда эканлигини таъкидлади”, — дейди Худойберди Йўлдошев.
Изоҳ (0)