O‘zbekiston 2030 yilga borib IT xizmatlar eksporti hajmini yiliga 5 milliard dollarga yetkazishi mumkin. Bu haqda raqamli texnologiyalar vaziri Sherzod Shermatov Toshkent shahrida bo‘lib o‘tgan Digital Leadership forumida ma’lum qildi, deya xabar bermoqda “Daryo” muxbiri.
Bugun, 7-iyul kuni Toshkent shahrida Raqamli texnologiyalar vazirligi tomonidan Digital Leadership xalqaro forumi bo‘lib o‘tkazildi. Tadbirda 300 dan ortiq BPO va IT-autsorsing kompaniyalari, xorijiy tashkilotlar, tadbirkorlar hamda butun dunyodan 20 dan ortiq spikerlar ishtirok etdi.
Forum ochilishida O‘zbekistonda IT sohasi qay darajada rivojlanayotgani, mazkur yo‘nalishda ish olib borayotgan tadbirkorlarga qanday sharoitlar yaratilgani haqida so‘z bordi.
Sherzod Shermatovning aytishicha, IT sohasini rivojlantirish bo‘yicha katta rejalar ishlab chiqilgan.
“Hozirda IT xizmatlar eksporti yiliga 300 million dollarni tashkil etadi. Oldimizda katta rejalar turibdi. Ya’ni 2030 yilga borib mazkur raqamni 5 milliard dollarga yetkazmoqchimiz. To‘g‘ri bunga ishonish qiyin. Biz ham avvaliga ishonmagandik. Lekin endi uddalashimizga aminmiz. Hozir O‘zbekistonda IT sohasining o‘zida 60ga yaqin oliy ta’lim muassasalari bor. Bir qator loyihalarimiz amalga oshsa, albatta ko‘zlangan maqsadga erishamiz”, — dedi vazir.
Forumda IT-park tomonidan erishilayotgan natijalar haqida ham so‘z bordi. Aytilishicha, 2019-yilda IT-park rezidentlari soni 147 ta bo‘lgan, joriy yilga kelib ular soni 1 ming 400 taga yetgan. Rezidentlar tomonidan ko‘rsatilgan xizmatlar hajmi 2017-yilda 179,9 milliard so‘mni tashkil etgan bo‘lsa, 2022-yil yakunida 28,3 barobarga ortib, 5,1 trillion so‘mga yetgan. Eksport salmog‘i 82 barobarga o‘sib, 140 million dollarga yetkazilgan.
Izoh (0)