O‘zbekistonda raqobat to‘g‘risidagi qonunchilik hujjatlarini buzganlik uchun maʼmuriy javobgarlik choralari kuchaytirildi, deb xabar beradi Telegram’dagi “Huquqiy axborot” kanali.
Qonun bilan Maʼmuriy javobgarlik to‘g‘risidagi kodeksga kiritilgan o‘zgartirishga ko‘ra.
Raqobat sohasidagi vakolatli davlat organiga axborot taqdim etmaslik yoki o‘z vaqtida taqdim etmaslik yoxud unga bila turib noto‘g‘ri maʼlumotlarni taqdim etganlik:
- fuqarolarga BHMning 3 baravaridan 10 baravarigacha (990 ming so‘mdan 3 million 300 ming so‘mgacha);
- mansabdor shaxslarga esa 10 baravaridan 20 baravarigacha (3 million 300 ming so‘mdan 6 million 600 ming so‘mgacha) miqdorda jarima solishga sabab bo‘ladi.
Ilgari: fuqarolarga BHMning 3 baravarigacha, mansabdor shaxslarga esa 5 baravarigacha jarima qo‘llanilgan.
Davlat hokimiyati va boshqaruvi organlarining mansabdor shaxsi tomonidan xomashyo, tovarlar erkin harakatlanishini va realizatsiya qilinishini hamda xizmatlar ko‘rsatilishini qonunga xilof ravishda cheklash:
- BHMning 30 baravaridan 50 baravarigacha (9 million 900 ming so‘mdan 16 million 500 ming so‘mgacha) miqdorda jarima solishga sabab bo‘ladi.
Faoliyatning ayrim turlarini litsenziyalashni amalga oshirish, ruxsat etish xususiyatiga ega hujjatlarni berish yoki maxsus elektron tizim vositasida xabarnomalarni qabul qilish vakolatlari yoki ro‘yxatga olish yoxud akkreditatsiyadan o‘tkazish vakolatlari berilgan davlat unitar korxonalari yoki muassasalari yoxud yuridik shaxslarning birlashmalari tomonidan raqobatni cheklaydigan qarorlar qabul qilish:
- BHMning 30 baravaridan 50 baravarigacha (9 million 900 ming so‘mdan 16 million 500 ming so‘mgacha) miqdorda jarima solishga sabab bo‘ladi. Ilgari bunday normalar mavjud emas edi.
Monopoliyaga qarshi kurashishga qaratilgan qonun
Kuni kecha “Raqobat to‘g‘risida”gi qonun yangi tahrirda qabul qilingani to‘g‘risida xabar berilgandi. Qonun bilan raqobat sohasidagi davlat siyosatining asosiy yo‘nalishlari belgilangan. Qonunga ko‘ra, Raqobatni rivojlantirish va isteʼmolchilar huquqlarini himoya qilish qo‘mitasi raqobat sohasidagi vakolatli davlat organi (monopoliyaga qarshi organ) hisoblanadi.
2020-yil 28-may kuni Shavkat Mirziyoyev tomonidan o‘tkazilgan iqtisodiyotda raqobat muhitini ta’minlash va iste’molchilar huquqini himoya qilish borasidagi vazifalar muhokamasiga bag‘ishlangan yig‘ilishda raqobatni rivojlantirish va monopoliyaga qarshi kurashish borasida mutlaqo yangi tizim yaratish, davlat ishtirokidagi korxonalarda monopoliyaga qarshi kompleks tizimini joriy etish lozimligi ta’kidlangandi.
Komplayens tizimini joriy etish ishlari ilk marta 2019-yilning noyabrida Bosh prokuratura tomonidan “O‘zbekneftgaz” va “O‘zkimyosanoat” kompaniyalarida boshlangan. Monopoliyaga qarshi kurashish qo‘mitasi ishlab chiqqan hukumat qarori loyihasida esa 2021-yil 1-yanvardan boshlab tajriba (sinov) tariqasida davlat ishtirokidagi ayrim korxonalarda monopoliyaga qarshi komplayens tizimini joriy etish majburiy hisoblanishi belgilangan edi. Keyinroq 2020-yil 1-oktabrga qadar neft-gaz tarmog‘idagi barcha korxonalarda korrupsiyaga qarshi komplayens-nazorat tizimi joriy etilishi haqida xabar berilgan.
Izoh (0)