Iqtisodiyot va moliya vazirligi Bojxona yig‘imlari stavkalariga o‘zgartirish va qo‘shimchalar kiritish to‘g‘risida hukumat qarori loyihasini muhokamaga qo‘ydi.
Gap avtotransport vositasini bir kalendar yil davomida 90 kalendar kundan ortiq muddatga vaqtinchalik olib kirganlik uchun olib chiqib ketish muddatining o‘tkazib yuborilgan har kuni uchun yig‘im undirish haqida ketmoqda. Hozirda u dvigatel quvvatiga bog‘liq — har bir ot kuchi uchun BHMning 0,7 barobari (2310 so‘m).
O‘zgartirish bilan ushbu miqdorni kuniga BMHning bir baravari (330 ming so‘m) etib belgilash taklif etilmoqda. Shu bilan birga, stavkaning umumiy miqdori, avvalgidek, avtomobilning to‘liq bojxona rasmiylashtiruvi narxidan oshmasligi kerak.
Ta’kidlanishicha, bu bojxona maʼmuriyatchiligini isloh etish, bojxona va yuk operatsiyalarini amalga oshirish jarayonlarini yanada soddalashtirish maqsadida amalga oshirilmoqda.
Prezident Shavkat Mirziyoyev 2022-yil 21-fevralda “Avtotransport vositalarining ichki bozorini rivojlantirishni rag‘batlantirishga doir qo‘shimcha chora-tadbirlar to‘g‘risida”gi qarorni imzolagandi. Kiritilgan o‘zgartirishlarda avtomobillarni olib kirishdagi bojxona to‘lovlari stavkalari ikki bosqichda pasaytirilishi belgilangan. Hujjat imzolangan paytdan boshlab 2023-yil 1-yanvarga qadar bojlar ikki yoki undan ortiq baravarga pasaytirildi.
2023-yilning iyun o‘rtalarida esa prezident ayrim toifadagi mashinalar uchun bojxona to‘lovlarini keskin kamaytirish bo‘yicha uzoq kutilgan qarorni imzoladi. Qarorga ko‘ra, ishlab chiqarilganiga 1 yildan oshmagan, dvigatel hajmi 1 200 sm kubdan yuqori bo‘lmagan yangi yengil avtotransport vositalari uchun (TN TIF kodi 8703 21 10, 8703 22 10 va 8703 31 10) 2026-yil 1-yanvarga qadar yangicha bojxona boji stavkalari belgilanmoqda.
Izoh (0)