Маданият ва туризм вазирининг тегишли буйруғига биноан Маданият ва туризм вазирлиги ҳузурида маданият марказлари фаолиятини мувофиқлаштириш бўйича Жамоатчилик кенгаши ташкил этилди. Бу ҳақда вазирлик матбуот хизмати хабар берди.
Жамоатчилик кенгашининг асосий вазифалари сифатида қуйидагилар белгиланди:
- маданият марказларида аҳолига маданий хизмат кўрсатиш сифатини ўрганиш, уларда маданий эҳтиёжларни қондириш ва бўш вақтларини мазмунли ўтишини таъминлаш бўйича амалга оширилган ишлар кўламини ўрганиш;
- ижодий жамоаларнинг миллий қадрият, урф-одат ва анъаналарни ўзида мужассам этган намунали дастурлари шакллантирилганлиги, халқ ижодиёти ва бадиий ҳаваскорлик санъатини сақлаб қолиш ва ривожлантириш, бадиий ва амалий ижодий жамоалар, ҳаваскорлик гуруҳлари фаолиятини ўрганиш;
- болаларни тўгаракларга жалб этиш ҳолати ва тўгаракларнинг ташкил этилганлик даражаси;
- маданият марказларида кадрлар салоҳиятини таҳлил этиш ва тавсиялар ишлаб чиқиш;
- оммавий байрам, томоша ва халқ сайилларини ташкиллаштириш, ижтимоий-маданий соҳада юридик ва жисмоний шахслар билан тузилган шартномалар бўйича уларга пулли хизматлар кўрсатиш ҳолати;
- танловлар, халқ ижодиёти ва томоша санъатининг туман (шаҳар) фестивалларини ўтказиш, иқтидорли ёшларни аниқлаш, ижодкор ёшларни қўллаб-қувватлаш бўйича амалга оширилган ишлар даражаси.
Шунингдек, кенгаш маданият марказлари фаолиятини тизимли равишда ўрганиш ҳамда амалий ёрдам кўрсатиш бўйича ҳудудий бошқармаларга таклифлар киритиш, маданият ва туризм бўлимларига жамоатчилик кенгаши ваколатига кирадиган масалалар юзасидан таклифлар киритиш, маданият марказлари фаолияти самарадорлигини ошириш бўйича таклиф ва тавсиялар ишлаб чиқиш ва вазирликка киритиш сингари ҳуқуқларга эга.
2018 йилнинг октябрь ойида Маданият вазирлиги ҳузурида Жамоатчилик кенгаши тузилганди. Шу муносабат билан вазирликда ўтказилган йиғилишда собиқ маданият вазири Бахтиёр Сайфуллаев жамоатчилик кенгашларининг асосий вазифаси давлат органлари ва уларнинг мансабдор шахслари фаолияти устидан жамоатчилик назоратини ўрнатиш, фуқаролар ва давлат органлари ўртасида ўзига хос кўприк бўлиб хизмат қилиши лозимлигини таъкидлаган эди.
Изоҳ (0)