Andijon viloyati Jalaquduq tumanida fuqaroning uyi farzandlari tomonidan noqonuniy olib qo‘yilgani aytildi. Viloyat prokuraturasi holat yuzasidan ma‘lumot berdi.
Unga ko‘ra, fuqaro S.E.ga tegishli bo‘lgan tumandagi “A.Rahmonov” mahallasida joylashgan uy 2020-yilda hadya shartnomasiga asosan fuqaro K.A.ga hadya qilingan. Shu kunning o‘zida fuqaro K.A. nizoli uyning 1\2 qismini fuqaro G.E.ga shartnoma asosida hadya qilgan.
Biroq 2022-yilda fuqaro K.A. uy-joyni sotish vaji bilan javobgar G.E.ga nisbatan hadya shartnomasini bekor qilish haqida FIB Xo‘jaobod tumanlararo sudiga daʼvo ariza bilan murojaat qilgan. Fuqarolik kodeksining 72-moddasi 1-qismida, har bir taraf o‘zining talablari va eʼtirozlarini asos qilib ko‘rsatgan holatlarini isbotlashi shartligi ko‘rsatilgan, biroq, daʼvogar hadya shartnomasini bekor qilish uchun asos bo‘lgan 507-moddasida ko‘rsatilgan holatlarni tasdiqlovchi dalillarni sudga taqdim etolmaganligi bois ushbu sudning 2022-yilgi hal qiluv qarori bilan daʼvo talabi rad qilingan.
Viloyat prokuraturasi tomonidan sudning ushbu qaroriga nisbatan protest keltirish uchun yetarli asoslar topilmagan va bundan fuqaro S.E. yozma ravishda xabardor etilgan.