O‘zbekistonning Frankfurt-Mayndagi Bosh konsulxonasiga Work and Travel dasturi bo‘yicha Germaniyaga kelgan, ish bilan bog‘liq muammolar va yetarli moliyaviy resurslar yo‘qligi sababli Myunxendagi markaziy vokzalda tunashga majbur bo‘lgan O‘zbekiston fuqarolari haqida maʼlumot kelib tushdi, deb ma’lum qildi diplomatik muassasa.
Qayd etilishicha, O‘zbekistonning Turon World konsalting kompaniyasi 98 nafar O’zbekiston fuqarolarini Work and travel dasturi bo‘yicha Germaniyaga mavsumiy ishlarga jo‘natgan.
O‘zbek diplomatlari “Humo” o‘zbek-nemis madaniy jamiyati faollari bilan birgalikda voqea joyiga zudlik bilan yetib borgan va o’zbekistonlik vatandoshlar bilan hamkorlikda 35 nafar O‘zbekiston fuqarolariga ushbu hududda vaqtincha yashashi uchun zarur yordam ko‘rsatgan.
O‘zbekistonning Berlindagi elchixonasi va Frankfurt-Mayndagi Bosh konsulxonasi vaziyatni nazoratga olganini bildirdi. Vakolatli organlar bilan hamkorlikda mazkur muammoni bartaraf etish choralari ko‘rilmoqda, deyiladi muassasa bayonotida.
Eslatib o‘tamiz, ijtimoiy tarmoqlarda bir guruh O‘zbekiston fuqarolari ishlash maqsadida Germaniyaga borib, qiyin ahvolda qolgani haqida video tarqaldi. Unda 300 ga yaqin yoshlar ishlash uchun borib sarson bo‘lib yurgani, qayerga borishini bilmay bir necha kundan beri vokzalda tunayotgani aytilgan.
Izoh (0)