Parijga yaqin Nanter shahrida politsiyachi 17 yoshli o‘smirni o‘ldirganidan keyin tartibsizliklar boshlandi. Politsiya yetti kishini hibsga oldi. Bu haqda Le Monde gazetasi xabar berdi.
Le Monde nashrining yozishicha, politsiyachi 17 yoshli o‘smirdan yana ikki yo‘lovchi bilan bo‘lgan mashinani to‘xtatishni talab qilgan. O‘smir bu talablarni bajarishdan bosh tortganida politsiyachi uni otib tashlagan. Voqea 27-iyun kuni ertalab sodir bo‘lgan.
Politsiya xodimi qasddan odam o‘ldirishda gumonlanib hibsga olingan. O‘ldirilgan o‘smir boshqargan avtomobil yo‘lovchilaridan biri ham qo‘lga olindi, yana biri qidirilmoqda. BFMTV telekanali maʼlumotlariga ko‘ra, o‘smir avvalroq haydovchilik guvohnomasisiz mashina boshqargani va politsiya talablarini bajarishdan bosh tortgani qayd etilgan.
Kechqurun Nanterda mahalliy politsiya binosi oldida norozilik namoyishi bo‘lib o‘tdi. Keyinchalik u tartibsizliklarga aylandi. Namoyishchilarning ba'zilari barrikadalar va axlat qutilariga o't qo'yishdi, avtobus bekatini sindirishdi va politsiyaga petardalar otishdi. Bunga javoban politsiya ko‘zdan yosh oqizuvchi gaz ishlatgan. Tartibsizliklar vaqtida yetti kishi hibsga olindi, deb yozadi Le Monde politsiyaga tayanib. BFMTV maʼlumotlariga ko‘ra, kamida bir kishi jarohat olgan.
Izoh (0)