Ijtimoiy tarmoqlar, xususan, bir qator yirik auditoriyali Telegram kanallarda endi O‘zbekistonda artizan quduqlari va vodoprovodga ulangan barcha avtomoykalar faoliyati bosqichma-bosqich to‘xtatilishi haqida xabarlar e’lon qilindi.
“Daryo” ushbu ma’lumotlarning qanchalik haqiqatga yaqinligini tekshirish maqsadida “O‘zsuvta’minot” aksiyadorlik jamiyati bilan bog‘landi.
Tarmoqdagi xabarlarda endi avtomobillarni yuvish biznesi bilan shug‘ullanayotgan tadbirkorlarga kanallar, katta ariqlar, soylar va ko‘llarga yaqin hududlardan avtomoyka ochishga ruxsat berilishi, bunda oqar suvni ekologiyaga zararsiz darajada filtrlash va qayta o‘z manbasiga oqizib yuborish texnologiyasini qo‘llagan holda faoliyat yuritish shart qilinishi aytilgandi.
“O‘zsuvta’minot” matbuot xizmati rahbari Akmal Murodovning ma’lum qilishicha, bu kabi xabarlar haqiqatga to‘g‘ri kelmaydi.
“Avtomoykalar faoliyati cheklanishiga oid xabarlar asossiz. Barcha rasmiy ma’lumotlarni o‘z kanalimizda e’lon qilamiz, tez orada shu mavzuda matbuot anjumani o‘tkazishni ham reja qilganmiz”, — deya aytib o‘tdi u.
Avvalroq prezidentning tegishli farmoni bilan O‘zbekistonda isteʼmolchilarga suv yetkazib berish bosqichma-bosqich davlat-xususiy sheriklikka o‘tkazilishi xabar qilingandi.
Shuningdek, iqtisodchi Otabek Bakirov suv isrofini kamaytirish bo‘yicha takliflarini berib, suv uchun ratsional tariflarning joriy etilishi muammoga asosiy yechim ekanini aytgandi.
“Suvni isrof qilma deyish bekor, suvni ko‘p sarflagan qimmat to‘lashi kerak, bo‘ldi. Istalganingcha sarfla, lekin marhamat qilib bozor narxida to‘lab qo‘y. Shunda o‘zbek ham xuddi nemis singari kuniga 125 litr suv bilan kifoya qila boshlaydi, bir stakan suv bilan tishini yuvadi, ikkinchi stakandagi suv bilan soqol oladi, suv oqib yotgan unitazini darrov ta’mirlaydi”, — deb yozgan iqtisodchi.
Izoh (0)