Toshkent shahar sog‘liqni saqlash bosh boshqarmasi davlat tibbiy sug‘urtasi uchun poliklinikada ro‘yxatdan o‘tmagan aholiga pulli xizmat ko‘rsatilishi haqidagi xabarlar asossizligini ma’lum qildi.
Ijtimoiy tarmoqlarda Toshkent shahridagi tibbiyot muassasalari davlat tibbiy sug‘urtasi tizimiga o‘tishi bois oilaviy poliklinika xodimlari fuqarolardan shaxsiy hujjat ma’lumotlarini talab qilayotganiga doir xabarlar tarqalgandi. Toshkent shahar sog‘liqni saqlash bosh boshqarmasining tushuntirish berishicha, 2023-yil 1-iyuldan Toshkent shahrida davlat tibbiy sug‘urtasi tizimi mexanizmlarini joriy etish belgilangan. Buning uchun poytaxtdagi 72 ta poliklinika, 12 ta ko‘p tarmoqli markaziy polikliklinika va 40 ta shifoxona kompyuter jihozlari, zarur tibbiy uskunalar bilan ta’minlanib, tibbiyot muassasalarini to‘liq raqamlashtirish uchun barcha sharoitlar yaratildi.
Mazkur tizim ishga tushgach, fuqarolar kafolatlangan tibbiy xizmat ko‘rsatish paketlaridan foydalanish imkoniga ega bo‘ladi. Ya’ni elektron bazaga har bir bemorning tashxisi, kasalliklari, olgan muolajalari haqida to‘liq ma’lumotlar kiritilib, shifokor shu asosda bemorni nazoratga oladi va profilaktika hamda davolash choralarini ko‘radi. Qolaversa, bemorlar dorilarni elektron usulda ham olishi mumkin. Natijada oilaviy poliklinikalardagi navbatlarning oldi olinib, qatnovlar soni kamayadi.
Afsuski, so‘nggi kunlarda davlat tibbiy sug‘urtasi tizimining mohiyati to‘liq anglab yetilmasdan jamoatchilik orasida “endi oilaviy poliklinika xizmatlari pullik bo‘lar ekan” degan noto‘g‘ri tushuncha paydo bo‘lmoqda. Avvalo shuni aytish kerakki, poliklinikada ro‘yxatdan o‘tmagan aholiga pullik xizmatlar ko‘rsatilishi haqida internetda tarqalgan xabarlar asossiz. Normativ hujjatlarga ko‘ra, respublikaning barcha fuqarolariga davlat tomonidan kafolatlangan tibbiy xizmatlar hajmi doirasida davlat tibbiy xizmatlari bepul taqdim etiladi, — deyiladi xabarda.
Buning uchun fuqaro endilikda oilaviy shifokor qabuliga kelgan vaqtda identifikatsiyadan o‘tishi lozim. Ya’ni “Elektron poliklinika”ga ma’lumotlarni kiritish uchun fuqaro shaxsini tasdiqlovchi hujjatni taqdim etishi zarur.
Toshkent shahar sog‘liqni saqlash bosh boshqarmasining telefon orqali kimdir o‘zini oilaviy poliklinika xodimi deya tanishtirsa va o‘zingiz hamda oila a’zolaringiz pasporti va farzandlaringizning tug‘ilganlik haqidagi guvohnomalari nusxalarini internet tarmog‘i orqali uzatishni so‘rasa, buni rad etishga chaqirdi.
“Aksincha oilaviy poliklinika xodimlari telefon orqali sizdan pasport ma’lumotlarini tasdiqlash uchun vaqt ajratishingiz va tibbiyot muassasasiga shaxsan kelishingizni so‘raydi. Birlamchi tibbiy-sanitariya yordam muassasalariga biriktirish voyaga yetgan shaxs tomonidan amalga oshiriladi. Voyaga yetmagan shaxslarni biriktirish uning ota-onasi yoki boshqa qonuniy vakillar tomonidan bajariladi.
Shu o‘rinda poytaxt aholisidan Toshkent shahridagi tibbiyot muassasalari davlat tibbiy sug‘urtasi tizimiga o‘tishi munosabati bilan o‘zi va oila a’zolarining shaxsiy hujjatlari bilan hududiy oilaviy poliklinikalarga murojaat qilishlarini so‘raymiz”, — deyiladi rasmiy xabarda.
Izoh (0)