Ижтимоий тармоқлар, хусусан, бир қатор йирик аудиторияли Telegram каналларда энди Ўзбекистонда артизан қудуқлари ва водопроводга уланган барча автомойкалар фаолияти босқичма-босқич тўхтатилиши ҳақида хабарлар эълон қилинди.
“Дарё” ушбу маълумотларнинг қанчалик ҳақиқатга яқинлигини текшириш мақсадида “Ўзсувтаъминот” акциядорлик жамияти билан боғланди.
Тармоқдаги хабарларда энди автомобилларни ювиш бизнеси билан шуғулланаётган тадбиркорларга каналлар, катта ариқлар, сойлар ва кўлларга яқин ҳудудлардан автомойка очишга рухсат берилиши, бунда оқар сувни экологияга зарарсиз даражада фильтрлаш ва қайта ўз манбасига оқизиб юбориш технологиясини қўллаган ҳолда фаолият юритиш шарт қилиниши айтилганди.
“Ўзсувтаъминот” матбуот хизмати раҳбари Акмал Муродовнинг маълум қилишича, бу каби хабарлар ҳақиқатга тўғри келмайди.
“Автомойкалар фаолияти чекланишига оид хабарлар асоссиз. Барча расмий маълумотларни ўз каналимизда эълон қиламиз, тез орада шу мавзуда матбуот анжумани ўтказишни ҳам режа қилганмиз”, — дея айтиб ўтди у.
Аввалроқ президентнинг тегишли фармони билан Ўзбекистонда истеъмолчиларга сув етказиб бериш босқичма-босқич давлат-хусусий шерикликка ўтказилиши хабар қилинганди.
Шунингдек, иқтисодчи Отабек Бакиров сув исрофини камайтириш бўйича таклифларини бериб, сув учун рационал тарифларнинг жорий этилиши муаммога асосий ечим эканини айтганди.
“Сувни исроф қилма дейиш бекор, сувни кўп сарфлаган қиммат тўлаши керак, бўлди. Исталганингча сарфла, лекин марҳамат қилиб бозор нархида тўлаб қўй. Шунда ўзбек ҳам худди немис сингари кунига 125 литр сув билан кифоя қила бошлайди, бир стакан сув билан тишини ювади, иккинчи стакандаги сув билан соқол олади, сув оқиб ётган унитазини дарров таъмирлайди”, — деб ёзган иқтисодчи.
Изоҳ (0)