Xorazmda Damas haydovchisi Xiva shahar IIB boshlig‘ini urib yubordi. Bu haqda Bosh prokuratura axborot xizmati rahbari Hayot Shamsutdinov xabar qildi.
Qayd etilishicha, jabrlanuvchi og‘ir ahvolda shifoxonaga yotqizilgan. Holat yuzasidan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan. Tergov harakatlari olib borilmoqda.
Xorazm viloyati IIB matbuot xizmatining UzNews’ga ma’lum qilishicha, voqea 25-iyundan 26-iyunga o‘tar kechasi soat 00:10 larda Xiva shahar IIB maʼmuriy binosi oldida yuz bergan. Mast haydovchi yo‘lni kesib o‘tayotgan Xiva shahar IIB boshlig‘ini urib yuborgan va mashinani hodisa joyida qoldirib, nomaʼlum tomonga yashiringan. Olib borilgan tezkor-qidiruv ishlari natijasida haydovchi qo‘lga olingan.
Izoh (0)