Toshkent viloyati Chinoz tumanida g‘alladan bo‘shagan yer maydoni yongani haqida xabar berilgan edi. Ekologiya vazirligi hamda Toshkent viloyati Ekologiya boshqarmasi mas’ullari holatni voqea joyiga chiqib o‘rgandi.
O‘rganish davomida Chinoz tumani, “Tillatopgan” MFY hududidan o‘tuvchi M-39 avtomagistral yo‘l bo‘yida fermer xo‘jaligiga qarashli g‘alladan bo‘shagan yer maydonida 11,6 gektar somonpoya qoldiqlari yoqilgani aniqlandi.
Natijada dala chegara qismiga qator qilib ekilgan 20 tup tut daraxti o‘sishdan to‘xtamaslik darajasida shikastlangani, 11 tup tut daraxti esa o‘sishdan to‘xtash darajasida kesilgani ma’lum bo‘ldi. Fermer xo‘jaligi rahbari A.Y. voqea joyida haqiqatan ham g‘alladan bo‘shagan yer maydonida somonpoya qoldiqlari yoqilgani yuzasidan yozma ravishda tushuntirish bergan.
Yong‘in natijasida tuproqdagi gumus va azot yo‘qotilgani sabab tuproq unumdorligiga 24 million 692 ming 896 so‘m miqdorida zarar yetkazilgan. O‘simlik dunyosiga yetkazilgan zarar 73 million 590 ming so‘mni tashkil etgan. Umumiy olganda g‘alladan bo‘shagan maydonni yoqish va daraxtlarni kesish natijasida tabiatga jami 118 million 082 ming 896 so‘m zarar keltirilgan.
O‘rganish ishlari davomida to‘plangan hujjatlar huquqiy baho berish uchun tuman prokuraturasiga topshirildi.
Izoh (0)